Hîrê tepişteyanê nêweşan Zekî Bayhan, Ramazan Çelîk û Yucel Kizmazî  Zîndanê Kiriklarî de vera binpaykerdişanê heqan dest pê grevê vêşanîye yê bêdem û bêdore kerd.

Tepişteyanê nêweşan bi rayîrê avûkatanê xo pare kerd e seba ke tepişteyê nêweşî heman oda de yenê cakerdene, tepişteyê sîyasîyî odayanê cîyayan de tepişîyenê, serê warê hewagirewtişî pê têlan qefilîyayo û aktîvîteyê sosyalî yenê sînorkerdene înan dest pê grevî kerdo. Tepişteyan venga rayaumûmîye û dezgehan da ke derheqê babete de bi hîsgerî têbigêrê.

Zîndanê Kalkandere yê Rîze de zî Mîrza Çaglayano ke raştê îşkenceyê gardîyanan amebi 4 rojî yo tira xebere nêna girewtene. Goreyê agahîyanê ke merdimanê ey dayê, gardîyanan 26ê tebaxe de eşto koxûşê Çaglayanî ser, ci rê îşkence kerdo û dima o koxûşî ra veto. Dîya zanayene ke 5 rojî yo aqîbetê Çaglayanî nêzanîyeno û rixmo ke keyeyê ey pers kerdo îdareyê zîndanî agahîyêke nêdaya keyeyî.