Tepişteyanê Zîndanê Şakranî yê Îzmîrî binpaykerdişanê heqan ser o mektûbêke şawite Komeleya Hetkarîya bi Keyeyanê Hukmwerdeyan û Tepişteyan a Ege (EGE-TUHAYDER) û rayaumûmîye ra waşt ke bi lezabezî têbigêrê.

Mektûbe de bale ameye antene nê binpaykerdişanê heqan ser:

-Bi bahaneya janê Korona pêro aktîvîteyî wedarîyayî. Kapasîteya înan ra zêdêr tepişteyî koxûşan de manenê ke no zî vilabîyayîşê janî zêdîneno.

-Şîyayîş-agêrayîşê nêweşxaneyan de kerdişê karantîna yeno ferzkerdene ke odayê karantîna goreyê tedbîranê vera janî nîyê.

-Tepişteyî wextanê mehqûlan de nênê berdene bi revîrî û doktorê revîrî bi hawayêkê xirabî nêzdîyê tepişteyan benê.

-Werdê zîndanî kêm û xiran ê. Fîyatê berhemanê kantînî vay ê, tepişteyî awe hêrînenê û faturaya ceyranî danê.

-Tepişteyê sîyasî qestî ra keyeyanê xo ra dûrî ra yenê surgunkerdene-sewqkerdene.

-Wextê pêvînayîşî kêm o. Radyo, kovar û rojnameyî nêdîyenê tepişteyan.

-Mektubê ma nêerşawîyenê û nêdîyenê tepişteyan. Mektubê bi kurdkî bi hewteyan yenê vindarnayene.

-Tepişteyî semedo ke bi kurdkî deyîran vanê raştê cezaya dîsîplînî yenê, govende û deyîrê bi kurdkî sey sloganî hesibîyenê û benê sebebê ceza. Gardîyanî tim erzenê koxûşan ser, dest nanê hacetanê şexsîyan ser. Ameyîş-agêrayîşê nêweşxaneyan de leşkerî serê tepişteyan cigêrenê û meseleya cigêrayîşê rûtî nêna çareserkerdene.

-Gardîyanî bi bahaneya fermanê Wezaretê Edaletî şewe erzenê koxûşan ser, bi zorî tepişteyî odayanê bînan de ca kenê.

Tepişteyan peynîya mektube de venga pawitoxanê heqanê merdiman da û vat: ''Ma şima ra pawenê ke semedê qedînayîşê nê binpaykerdişanê heqan cade têbigêrê.''