Nameyê tepişteyanê dewaya PKK û PAJKî ser o Denîz Kaya derheqê hêrişanê îşxalî de eşkerayîyêke daye.

Eşkerayîye wina ya:

''Sey tepişteyanê dewaya PKK û PAJKî, rixmê şertanê zîndanan zî ma serebûtan nêzdî ra teqîb kenê. Goreyê agahîyanê kêmanê ke resayê destê ma, dewleta tirke bi çekanê şerî yê hîra û komplîkeyan vera Herêmanê Pawitişî yê Medya dest pê hêrişê îşxalî kerd.

Dewleta tirke xîret kena ke PDKyî zî tewrê nê şerî bikera. PDK asta îxanetî de teslîmê Tirkîya bîyo. Mîsalê ney o tewr zelal zî no yo ke hêrişan ra verî Mesrûr Barzanî û Erdoganî Dolmabahçe de pêvînayîş kerd. Fotografê nê pêvînayîşî mîsalo tewr zelal ê hemkarîye, koletîye û teslîmbîyayîşê xanedanîya Barzanîyan o. Hînî seba Barzanîyan dersê sey kurdayetîye nêmendo, seba înan holîya înan têna girîng a. Barzanîyan Başûr şêlenayo, erjê madî yê şarî kontrol kerdo, welatanê Amerîka, Tirkîya û welatanê bînan de pereyî stok kerdî û bi nê hawayî bîyê çete. Seba ke têkoşînê azadîye, serkêşîya PKKyî de destkewteyanê kurdan paweno, PDK hêrişê ci keno. Çarenûsê na xanedanîye û yê Erdoganî bîyî yew. Erdogan çend kurdan bo nê zî hende kurd ê. Erdogan dişmenê kurdan o, seba çinkerdişê kurdan xebitîyeno. Barzanîyî zî nê esasî ser o xebitîyenê.

Raştîya Newroza 2022yî, şerwanîya fedayî ya gerîlayan do serkewtiş bîyarê ca. Ma xoverdayîşê zîndanan nê esasî ser o berz bikerê û serkewtişê 2022yî bîyarê ca. Ma venga şarê kurdî, şaranê herême û merdimîye danê ke bi hawayêkê aktîfî tewrê çalakîyan bibê. Vera nê hêrişanê çinkerdî  ganî her kes erkê xo bîyaro ca. Ma venga ciwanan danê ke tewrê gerîlayan bibê. Çinkerdişê nê hêrişanê îşxalî mesuldarîya her kesî ya. Wextê ci ameyo ke seba caardişê na mesuldarîye ma têbigêrê. Ma do qetî ser bikewê û Rayberê xo azad bikerê. Serkewtiş do ê gerîlayanê fedayîyan û şarê ma yê xoverdayoxî bibo.''