Tepişteyanê sîyasîyan ê Zîndanê Dumluyî yê Erziromî 8ê teşrîna peyêne de vera zulmî dest pê grevê vêşanîye kerd.

Zîndan de pancerayî bi têlan ameybî qefilnayene, odayê tepişteyan ameybî tarîkerdene.

Keyeyanê tepişteyan muracatê OHD û TUHAY-DERî yê Amedî kerd. Naye ser o OHD û TUHAY-DERî tepişteyan de pêvînayîş kerd û wina pawîyeno ke raporê xo rojanê verê ma de eşkera bikerê.

Waya tepişteyê grevî Serhat Karsuyî Aynure Taş qala tedayanê vera tepişteyan kerde. Serhat Karsu serra 2011î de qezaya Kanîreşî ya Çewlîgî de tepişîyabi.

Goreyê Karsuyo ke waya xo rê vato, wexto ke tepişteyê hewn de yê gardîyanî erzenê koxûşan ser û înan hişyar kenê.

Aynure Taş ard ziwan ke tewr peyên 18ê teşrîna peyêne de aye birayê xo zîyaret kerdo û birayê ci aye rê vato: ''Ma odaya yewkesî de manenê la wexto ke ma qîrenê vengê yewbînan eşnawenê. Wayîrê ma vejîyê. Gardîyanî pê asinan danê camanê ma. Ma hînî şewe û roje têmîyan kenê. Xîret kenê ke ma xo bikişê.''

Aynure Taş roja pêvînayîşê telefonî îneyî de birayê ci aye rê telefon nêkerdo. Aye naye ser o îdareyê zîndanî de qisey kerdo û îdareyê zîndanî ci rê vato ke 'odaya birayê to vurîyaya.'

Aynure Taş îfade kerd ke ganî vengê înan bêro eşnawitene û dewleta tirke seba zulmî domanê kurdan zîndanan de tepişena. Aynure Taş vat: ''Ma sey dadî û wayan nê zulmê dewlete qebul nêkenê.''