Zîndanê Metrîsî de Engîn Ataşo ke destê ci çin ê, Serdal Yildirimo ke nîmfelç o û Abdullah Turano ke milê ci ra cêrî felç o her çiqas raporê înan ê Dezgehê Tirpa Edlî (ATK) zî estê nênê veradayene û rewşa înan a weşîye her ke şino bena girane.

Endama ÎHDyî Hatîce Onaran pare kerd ke Zîndanê Metrîsî de binpaykerdişê heqan astêka bitehlûke de yê. Onarane da zanayene ke Aktaş zîndan de rîyê teşhîsê xeletî ra nêweşîya tîberkuloz bîyo û vist vîrî ke ganî nêweşî zîndanan de bi hawayêkê nîzamî bêrê weş kerdene. Hatîce Onaran bale ante ser ke înan seba tepişteyan murcatê Serdozgerîya Komare, Wezaretê Edaletî û zafê dezgehan kerd la cewabêk nêgirewt.

Onarane vat: "Eslê xo de no kerdişê dewlete îşkenceyêk o. Nê nêweşî hewcedarê miqatbîyayîşê kesan ê. Dewlete seke înan rê vana 'bimirê'. Veranêdayîşê înan bêmerdimîye û bêhuqûqîye yo. Nê hîrê nêweşî zî wayîrê raporê ATKyî yê. Bi nê hawayî ganî bêrê veradayene. La dewlete û dezgehî goş pê raporanê ATKyî nêkena. No qerarêko sîyasî yo. Dewleta bi nê tewirê xo tepişteyan rê îşkence kena.  No zî semedê merdimîye şermêko pîl o.''