Tepişteyê PKK û PAJK'î: Ma biheq ê û ma do ser bikewê!

Tepişteyanê PKK û PAJK'î derheqê herişanê îşxalkarî yê Tirkî  de bi eşkerayîyêk  daye vat: "Dewleta Tirkî estbîyayîşê xo serê çinbîyayîşê Kurdan saz kerd. La ê se kenê wa bikerê ma biheq ê û ma do ser bikewê."  

Tepişteyanê PKK û PAJK'î yê zîndananê Vakurê Kurdistanî û Trikîya verba hêrişanê îşxalkarîye yê dewleta Tirkî  yê  ke 9'ê Teşrîna Verêne ra nata serê Vakur û Rojakewtena Sûrîye de yenê domnayene, tewirê xo mojna.

Eşkerayîye de nê çîyî ameyî vatene:

"Bi nê hêrişan Dewleta TC'yî ya îşxalkare bi hewayêkê zelalî mojnena ke hetê bînê dinya de zî bibe Tirkîya estbîyayîşê Kurdî, destkewteyê Kurdî û statûyê Kurdî sey dişmen vînena û estbîyayîşê xo serê çinbîyayîşê Kurdan saz kena. Sere de şarê Vakurî, pêroyê Kurdî ganî na rewşe bivînê, rastîya îmhaya netewe fam bikê û wayîrê tawirêkî bibê. Teknîkêk, artêşêke nêeşkeno xoverdayîşê rêxistinîye yê şaro yewbîyayeyî û rexistinî çin biko. Ma veng danê pêroyê şarê Kurdî û hêzanê Kurdistanî ke yewîya xo ya neteweyî ya demokratîke bîyarê ca. Ma veng danê şaranê Rojakewtena Mîyanêne û şarê Tirkîya ke verba nê şerî bivejîyê ke qet sûda înan ci rê çin a. Ma veng danê merdimîya dinyaye ke wayîrê rûmetê merdimîye bivejîyê.

Ma tepişteyê PKK'yî û PAJK'î senî ke ma vizêr verê her çîyî de  şarê xo reyde bîyî, nika zî ma do şarê xo reyde bibê û fedaîyê şarê xo bibê. Senî ke 1998 de komploya mîyanneteweyî verê  tawiro adirên ê Halît Oral, Kurdî û Rotîndayan de pey ra şîya, nika zî nê hêrişî bi yewîya îradeyo şorişgêrî yê şaran, bi xoverdayîşo pêroyî eşkenê bêrê binkerdene. Ma sey şar û bindesteyan tim xurtêr û hayîdar ê. Ma biheq ê û ma do ser bikewê."