Nameyê tepişteyanê PKK û PAJKî ser o Denîze Kaya bi eşkerayîyêke bale ante qirkerdişanê zîndanan ser.

Eşkerayîye wina ya:

''Raştîya kurdan ewro zî raştê xîretê asîmîlekerdişî yê hêzanê dewlete yena û vera ney bi erjanê xo xo ver dana. Raştîya milîtananê PKK û PAJKî ya ke hetê Rayber Apoyî ra ameya afernayene bi îradeyê xo zîndanan ra heta koyan, şaristanan, dewan pêro waran de vera faşîzmî xo ver dana.

Xoverdayîşê Zîndanan ê 1982yî vera xîretê teslîmgirewtiş û bêrûmetkerdişî yê dewleta tirke ya kolonyalîste têkoşînê pawitişê rûmet û merdimîye kerd. Sloganê nê xoverdayîşî 'Xoverdayîş ciwîyayîş o', 'teslîmîyet îxanet o, xoverdayîş serfîrazî yo', PKKyî teslîmîyet nê xoverdayîş musna ma' bîyî kokê xoverdayîşê PKKyî û ruho esas ê gerîlayan. Xoverdayîşê gerîlayan beno xoverdayîşê zîndanan, xoverdayîşê zîndanan zî beno xoverdayîşê gerîlayan û bi nê hawayî xoverdayîşê zîndan û gerîlayan beno erjê xoverdayîşê merdimîye.

Sere de xoverdayîşê Îmraliyî yê Rayber Apoyî, xoverdayîşê gerîlayanê Zap, Avaşîn û Metîna û Şerwanîya Rûmetî ya zîndanan zor danê cerganê AKP-MHPyî yê NATOyî. Îqtîdar seba ke ney ra bixeliso hêrişê kurdan keno. Rejîmo faşîst AKP-MHP armanc keno ke pêro kurdan qir bikera û seba nê armancî verê xo da îmhaya kurdan. Tecrîd û îşkenceyê Îmraliyî, hêrişê kîmyewî yê vera gerîlayan, wehşetê vera cenazayanê gerîlayan, tedaya vera şarî, zîndanan de ferzkerdişê teslîmîyet û bêrûmetîye rîyê raştikênî yê AKP-MHPyî eşkera kenê. Raştîya dewlete-îqtîdarî ya ke hetê Rayber Apoyî ra amebî ercnayene, raştîya awanîya cergîya AKP-MHPyî zî eşkera kena.

Rejîmê AKP-MHPyî seba ke binkewtişê xo binimno verê xo dano zîndanan zî. Îqtîdar binê nameyê Wezîrîya Edaletî de cerganê faşîstan resneno, şeweno zîndanan û metodanê xo serê şorişgêran de ceribneno. Têna zereyê zîndanan nê nêweşxaneyî zî vurîyenê merkezê şerê taybetî û pê ferzkerdişê rûmetîyan tepişteyî heqê tedawî ra yenê mehrûmkerdene. Dezgehê sey ATKyî pê fermananê îqtîdarî şorişgêranê zaf nêweşan rê raporê fermanê mergî 'eşkenê zîndan de bimanê' danê û benê hemparê sûcî.

2022 de xeylêk embazê ma netîceyanê kerdişanê wehşîyan ê cerganê AKP-MHPyî de şehîd bîyî. Tewr peyên 14ê tebaxe de Zîndanê Xarpêtî de Îbrahîm Yildirim, 15ê tebaxe de Zîndanê Espîye yê Gîresunî de Mehmet Candemîr û 18ê tebaxe de Zîndanê Riha de Bazo Yilmaz ameyî qetilkerdene. 5 rojan de 3 embazê ma hetê cerganê faşîstan ê AKP-MHPyî ra bi hawayêkê plankerdeyî û qestî ra ameyî qetilkerdene. Mesuldarê nê qirkerdişanê plankerdeyan sere de rejîmê AKP-MHPyî, Wezîrîya Edaletî, ATKyî, hemkarê AKP-MHPyî, Mehkemeya Heqanê Merdiman a Ewropa û CPT yê!

Sere de keyeyê tepişteyan pêr şorişgêr, demokrat û sosyalîstê Kurdîstan û Tirkîya wa vera nê wehşetî bêveng nêmanê, bingeyê Şerê Şarî yê Şorişgêrî de mesuldaran ra hesab biprsê, rolanê xo yê komelkî û tarîxîyan bîyarê ca. Xoverdayîş û serewedaritişo topyekûn do derba peyêne bida AKP-MHPyî ro û do bibo gama tewr pîle ya wayîrvejîyayîşê tepişteyan. Hînî her kes zaneno ke nê kerdişî verî Îmrali de ameyî caardene, uca ra vilayê pêro zîndanan bîyî. Nê esasî ser o ma venga pêro şarê xo yê rûmetênî, demokrat, şorişgêr û sosyalîstan danê ke seba ke wehşetê zîndanan biqedo vera tecrîdê Îmraliyî vengê xo berz bikero, waran de têkoşîn bikero.

Embazanê ma Îbrahîm Yildirim, Mehmet Candemîr û Bazo Yilmazî vera kerdişanê zîndanî, tecrîd û îşkenceyî rixmê nêweşîyanê xo zî bi rûmetî xo ver da û teslîmê cerganê AKP-MHPyî nêbîyê. Sere de keyeyanê înan ê ercîyayeyan rê ma pêro şarê xo rê serweşîye wazenê. Ma soz danê ke rêçê şehîdanê xo de şorê, têkoşînê înan ê rûmetênî bidê dewamkerdene. Ma şexsê embazanê xo Îbrahîm Yildirim, Mehmet Candemîr û Bazo Yilmazî de pêro şehîdanê têkoşînê azadîye bi rêz û minetî yad kenê.''