Îşkenceyê vera tepişteyanê sîyasîyan ê Zîndanê Bafra yê Samsunî dewam keno. Tepişteyê nêweşê epîlepsî Selamî Keleşî pêvînayîşê telefonî de keyeyê xo rê qala binpaykerdişê heqan kerde.

Keleşî ard ziwan ke înan ser o teda û îkence est ê û vat: ''Sergardîyano newe surgunanê keyfîyan ferz keno, cezaya hucreyî dano ma, embazê ma ke cezaya înan qedîyaya vera nêdîyenê, nêweşî sewqê nêweşxaneyî nêbenê.''

Agît Tufano ke Zîndanê Bafra de maneno, zî pê telefonî keyeyê xo de qisey kerd û pare kerd ke koxûşan ser de teda est a, 6 tepişteyî yew hucre de tepişîyenê û 6 tepişteyî ameyê surgunkerdene. Tufanî da zanayene ke gardîyanan nêmeyê şewe de eşto koxûşan ser, dest nayo eşyayanê înan ser. Tufanî vat: ''Gardîyanan ma pê kiştişî tehdît kerdê. 6 embazê ma ameyî surgunkerdene. Bi taybetî sergardîyan Mustafa ma rê gefan waneno. Vengê ma bieşnawê.''