Îşkence û zulmê  dewleta tirke yê vera tepişteyanê sîyasîyan nêqedîyeno. Tepişte nêweşo giran Abdulhalim Kaya (86) Zîndanê Tîpê Myî yê Êlihî ra Zîndanê Tîpê Ryî yê Xarpêtî rê ame surgunkerdene.

Kaya seba ke 2008 de tewrê eşkerayîyêka çapemenîye bi cezaya 5 serran dîyaye ci.  Bursa de teşrîna verêne ya 2021yî  de rîyê nêweşîya prostatî ra ameliyat bi, hema ke encê amelîyatî nêameybî girewtene ame destbendkerdene û şawîya Zîndanê Tîpê Hyî yê Bursa.

Kayayo ke rixmo ke nêweşo  giran bi 60 rojî têna hure de mend, 4ê çeleyê 2022yî  de cezaya ci semedê 6 aşman ameye peydeeştene. 12ê teşrîna verêne ya 2022yî de Nêweşxaneyê Cipersayîş û Perwerdeyî yê Sêrtî raporê se ra 93 astendgar o da Kayayî la rixmê nê raporî 31ê adara 2023yî de reyna ame tepiştene û Zîndanê Tîpê Myî yê Êlihî de ame cakerdene. Kayayo ke 86 serre yo û  raporê ci yê se ra 93 astengdar o est o, tede nêweşîyê sey demans, qelb û xeylêk nêweşîyê giranî yê bînî est ê û bi yew velgî cuyeya xo domneno.

Kaya rixmo ke dest û lingan ra kewto 20ê adare de Êlihî ra destê ci kelemçekerde û çimê ci girewte amebi berdene Dezgehê Tibê Edlî yê Îstanbulî. Tîya newera raporê "eşkeno zîndan de bimano" dîyabi Kayayî.

Lajê Kayayî, Îsmaîl Kayayî ard ziwan ke dewleta tirke babîyê ci rê zulm kena û vat: "Babîyê mi rixmo ke extîyar û nêweşo 15 aşmî yo tepişte yo û 5 zîndanî bedilnayî. Edaletê AKPyî no yo. Babîyê mi yê nêweşî destanê ci kelemçekerde surgun kenê. Babîyê mi rê her roje ezîyet kenê. Ma sey keyeyê Kayayî semedê cuyeya babîyê mi qesawet kenê. Ma tîya ra veng danê; wa pêro tepişteyê nêweşî bêrê veradayene. "