Cenazaya tepişteyê nêweşî Abdulrezak Şuyurî yo ke bi hewayêkê şikdarî Zîndanê Şakranî dinyaya xo bedilnaye memleketê ci Sêrt de ameye definekrdene

Cenaza pê teyaraya kargoyî şawîyaye Êlih uca ra zî bi konveyêkê xurtî û slogananê ''şehîdî nêmirenî'' ameye berdene Sêrt. Goristanê Şêx  Musayî de bi hezaran kesî ameyî têhet. Polîsan goristan girewt binê ablûqa û vat têna 5 kesî eşkenê tewrê canaza bibê la şar rixmê astengkerdişê polîsan kewt goristan. Cenaza pê warkerdişê hesran ameye definkerdene.

Merdimê Şuyurî Selîm Ozalpî ke tîya qisey kerd ard ziwan ke şehadetê Şuyurî şikdar o û vat: ''Xora rapor de zî wina nusîya. Ganî berpirsîyarî cade na mesela safî bikerê. Wa sebebê mergî bêro roşnkerdene. Ma do peyê naye cameverdê. Tepişteyî xora mabênê çar dêsan de yê nêeşkenê nefes bîgirê hetê bînî ra raştê zextî yenê û mergî dir rî bi rî yê. Wa hinî zîndanan ra cenazayî mevejîyê. Hema ke erey nêbîyo wa tepişteyê nêweşî bêrê verdayene. Ma do wayîrê têkoşînê Abdulrezak Şuyurî bivejîyê.''

Wekîlê HDPyî yê Sêrtî Siddik Taşî zî vat: ''Îqtîdaro ke wazeno zîndanan bikero halînê mergî berpirsîyarê mergê tepişteyanê nêweşan o. Tecrîdo girano ke zîndanan de yeno domnayene beno sebebê mergan. Ganî têkoşîn bêro xurtkerdene ke tecrîd bêro wedaritene û zîndanan ra cenazayî merê.''

Taxa Çalî de semedê Şuyurî tezîye ameye ronayene.