Hemserekê Verênî yê HDPyî yê Mêrdînî Alî Aslano ke tede nêweşîyê şeker û tansîyon estê, keyeyê xo rê qala binpaykerdişê heqanê merdiman kerde.

Aslanî ard ziwan ke zîndan de ê vêşan verdîyenê û vat: ''Xeylêk rojan werd nêdîyeno ma. Werdo ke dîyeno 4 kesan domanê 6 serrî rê zî nêvejîyeno. Ma zafêr vêşan rakewenê. Wexto ke ma wazenê bi pereyê xo kantînî ra çîyêk bihêrînê, nêmê ci danê. Ma rê vanê ke heqê ma hendek o.''

Aslano ke kanûna 2019î de tepişîyabi  9 mengî verî Zîndanê Mêrdînî ra sewqê Zîndanê Amedî ame kerdene. Aslanî îfade kerd ke o nêame berdene bi blokê tepişteyanê sîyasîyan û mîyanê şert û mercanê giranan de yo. Aslanî vat: ''Ma rê teda û zorbazîye yena kerdene.''