Qezaya Edremîtî ya Qanî de 24ê temmuza 2018î de sereştişê keyeyan de Makbule Ozera 80 serre û mêrdeyê ci Hadî Ozero 79 serre pa domananê xo ameybî destbendkerdene. Netîceya dewaya vera înan de Hadî û Makbule Ozer 9ê gulane de tepişîyayî. Makbule Ozer nêweşîyanê xo ra 7ê êlule de vera dîyaye û înfazê ci ame taloqkerdene. La Hadî Ozer rixmê nêweşîyanê xo zî 6 mengî yo zîndan de yo.

Lajê Hadî Ozerî Medenî Ozerî dîyar kerd ke babîyê ci nêzdîyê 6 mengan o zîndan de bîlasebeb tepişîyeno û no zî polîtîkaya înkar û îmha ya vera kurdan a. Ozerî vat: ''Bi seyan merdimê bêgune û masumî bi hawayêkê îlegalî zîndanan de tepişîyenê. Nê zîndanan de kokim, nêweş, ciwan, cinî û domanî est ê.''

Ozerî da zanayene ke o hewteyê vîyarteyî de şibi hetê babîyê xo û dîyo ke rewşa ci bena giranêr. Ozerî vat: ''Seba ke ma pê rewşa ci nêhesîyê ey xîret kerdêne ke xo weş bimojno. Çimê ey de xemgînîye est bîye, destê ci lerzayêne. Vat 'Hewayê serdî ra ez qetî germ nêbena, cemidîyena.' Ma zaf xemgîn ê la têkoşînê xo rê dewam kenê. Ganî ma vera sîstemêkê zalimî, îlegalî xo ver bidê. Cayo ke tede edalet çin o uca de zulm est o. Ma seba pêro tepişteyan edaletî wazenê. Meseleya kurdan hînî têna yê kurdan nê yê pêro şaranê Tirkîya ya.''