Şaristanê Bernî yê Swêdî de seba Teslîm Toreyî yo ke rayberanê têgêrayîşê çepî yê Tirkîya ra yew bi embazan û keyeyê ci merasîmê oxirkerdişî kerd.

Merasîm Salona Goristanê Bern Bremgartenî de ame kerdene û keyeyê Toreyî, Hemserekê KONGRA-GElî Remzî Kartal, Endamê Heyetê Rayberdişî yê KCKyî Zubeyîr Aydar, Sereko anorkî yê HDP’yî Ertugrul Kurkçu, Hemsereka KCDK-E Fatoşe Goksungur, temsîlkarê têgêrayîşê çepî û sosyalîst ê Tirkîya û bi seyan kesî tewrê merasîmî bîyî.

Merasîmê cenaze de pankartê bi nuşteyê ''Kargehî, hêgayî, îqtîdar pêro bibê ê kede!'' ame daliqnayene. Nameyê Abdullah Ocalanî û KCKyî ser o zî çelengî ameyî erşawitene. Merasîm bi deqayêkê rêzgirewtişî dest pêkerd. Merasîmî de reya verêne lajê Toreyî Şukru Toreyî qisey kerd û vat: "Babîyê mi sey yew şorişgêrêkê rastikênî ciwîya. Babîyê mi xo dima de tarîxê têkoşînêk o pîl verda. Heta ke merd şorişê Rojawanî persayêne. "

Dima Ertugrul Kurkçuyî qisey kerd û vat: "Ma ewro embazê xo Tore raşt kenê. Cuya xo ya têkoşînî Tirkîya, Kurdîstan û Şorişê Rojawanî reyde dewam kerd. Ewro embazê ma, ma ra beno cîya la ma do eserê xo yê hempar bidê ciwîyayene û do ser bikewê. Rayîrê to akerde bo embaz.''

Bado zî Hemserekê KONGRA-GELî Remzî Kartalî qisey kerd û vat: "Sey şarê Kurdîstan û Tirkîya ma şorişgêrêko pîl vîndî kerd. Mi ewropa da o şinasna. Mi rê behsê têkoşînê xo kerd. Ey Abdullah Ocalanî zî şinasnayêne. Seba Ocalanî vatêne ke Ocalan Rayber o ke bi mîlyonan kesî dima ey de yê. Embaz Teslîm wa zerrîya to rehet ba. Têkoşînê to do dewam biko. Ma do ser bikewê."

Endamê Heyetê Rayberdişî yê KCKyî Zubeyîr Aydar zî ard ziwanê o Îmraliyî ra bi nameyê Rayberê Şarê Kurdî Abdullah Ocalanî û koyanê azadîye ra bi nameyê Hemserekê KCKyî Cemîl Bayîkî qisey keno û vat têkoşînê Toreyî  do şorişê Kurdîstanî û Tirkîya reyde bêro ciwîyayene.

Qiseykerdişan ra dima kênaya Toreyî  Sîda Tore seba babîyê xo deyîrêke vate. Tore 28ê teşrîna peyêne de do Goristanê Karacaahmetî yê Îstanbulî de bêro defnkerdene.