Wezîrîya Kultur û Turizmî û qeyûmê ke şaredarîyanê kurdan de ameyî cakerdene pîya qezaya Sûrîya ya Amedî de mabênê 8-16ê teşrîna verêne de do ‘’festîvale’’ bikerê. KCD, TJA, HDP, DBPyî pîya eşkerayîye daye û venga ke wa çew tewrê festîvala qeyûmî mebo.

Dezgehan vat: ‘’Ma venga şarê Amedî, dezgehanê demokratîkan, cinîyan û bi taybetî zî venga ciwanan danê ke wa tewrê na festîvala ke xizmetê polîtîkayanê çinkerdişê kultur, tarîx û mekananê vîrê ma kena, mebê û vera ci tewir bîgêrê.

Eşkerayîye de ame vîrvîstene ke pê qeyûman îradeyê şarê kurdî ame xespkerdene, şaredarîye açarîyayî warê rantî û  ame vatene ke na festîvale zî bi nê waştişî yena kerdene.

Reyna bale ameye antene terorê dewlete yê kuçeyanê Sûrî ser ke bi desan kesî ameyî qetilkerdene ser û ame vatene ke Sûro ke wayîrê tarîxê panc hezar serran o ame rijnayene.

Eşkerayîye de nê ameyî vatene: ‘’ Babîyê Hakan Arslanî, Alî Riza Arslanîo ke badê 7 serran esteyê lajê ci zereyê tewreyî dîyayî ci vat: ‘Eke şarê ma tewrê na festîvale bibo, ma reyna mirnenê.’  Şarê ma ganî wayîrê ercanê xo vejîyo û tewrê na festîvale mebo. Verê ke şima tewrê festîvale benê biewnê tarîxê Sûrî ra. Kesê ke tîya ameyî qetilkerdene hema hesirê dayîkanê înan ziwa nêbîyî. Banê ke serê esteyanê ciwananê ma de ameyî înşakerdene bi rayîrê festîvale kenê şarê ma rê bidê qebulkerdene. Şima zî hemkarê nê zîhnîyetî faşîstî mebê.’’