Kanala Franca 24î bale ante zêdîyayîşê dişmenîya vera xerîban ser. Koçberanê erebanê ke Bolu de manenê kanale rê qala nêzdîbîyayîşanê nîjadperestan kerd.

Koçberêkê erebo ke Iraqî ra yo û nêwaşt nameyê xo eşkera bikero vat: ''Bolu de mabênê iraqijan yan zî sûrîyeyîjan de cîyatîye nêna kerdene. Çend mengî verî Sûrîye de leşkerê tirkî merdbî. Tîya de înan ma sey mesuldaranê nê serebûtî ameyî dîyene. Ma rê wina ame vatene 'Şorê keyeyê xo, şer bikerê.' Ma şerî ra remayî la nika zî ma rê teda yena kerdene. Şero psîkolojîk şerê raştikênî ra giranêr o.''

Kanala 24î da zanayene ke bi taybetî krîzê ekonomîkî ra sebeb Tirkîya de nîjadperestîya vera koçber û multecîyan vera zêdîyena. Mîyanê nê hewteyî de qezaya Bayrampaşa ya Îstanbulî de multecîyêk hêrişê nîjadperstî de dinyaya xo bedilnaye.