Komîteya Wezîran a Konseya Ewropa (KWKE) kombîyayîşê xo yê 30ê teşrîna peyêne û 2ê kanûne de derheqê Rayberê Şarê Kurdî Abdullah Ocalanî û Hayatî Kaytan, Emîn Gurban û Civan Boltanî de 'bira hêvîye' ya Mehkemeya Heqanê Merdiman a Ewropa (MHME) ercnaye. MHME bira xo ya 2014î de ke sey 'Ocalan-2' zanîyeno, hukm dabi ke dewamkerdişê cezaya zîndanî ya muebede wa bêra vurnayene. Komîteya Wezîran zî kombîyayîşê xo de Tirkîya ra waşt ke babeta bira 'heqê hêvîye' ya MHME de gamê senînî eştî û venga ci da ke wa cade bire bîyara ca.

Serekwekîla Koma HDPyî û Wekîla Sêrtî Avûkate Merale Daniş Beştaş babete ANFyî rê ercnaye. Beştaşe ard ziwan ke bira Komîteya Wezîran zaf girîng a û vat: ''Tirkîya sey endamêka ci neçar a ke goreyê biranê MHME têbigêra. Eke îqtîdar nê biran ca nêaro Tirkîya beno ke endamîya Konseya Ewropa ra do bêra vetene. Tecrîdê vera Abdullah Ocalanî û tepişteyan ê bînan îşkenceyêko bêmabên o. Çunke tecrîd bi nîzamî yeno caardene û rewşe qerqilnena. Yew eleqeyê nê kerdişî pê huqûqî çin o. Tecrîd bi temamî sîyasî yo.''

Beştaşe bale ante ser ke qedexeyê pêvînayîşî yo peyên qetî nêno qebulkerdene û nê pêvînayîşî bi hawayêkê keyfî yenê astengkerdene. Beştaşe vat: ''Qedexeyê pêvînayîşî seba meşrûkerdişê tecrîdî yo. Labelê tabloyêko ke bêro meşrûkerdene werte de çin o. Ganî tecrîdê Îmraliyî cade bêro qedînayene û seba bira 'heqê hêvîye' ya MHME vurîyayîşî berê kerdene. HDP do heta peyên nê prosesî teqîb bikero. Xora avûkayê Buroyê Huqûqî yê Asrinî zî tim mekanîzmaya huqûqê mîyanneteweyî de eleqedar ê. ''