Goreyê vatişan Serekkomarê Tirkîya Erdogan û Esas do pêvînayîş bikerê. No zî sey vurîyayîşê polîtîkaya îqtîdarî ya serê Sûrîye yeno ercnayene. Serekê Rûmetî yê HDPyî û Endamê Rûmetî yê MPKE Ertugrul Kurkçuyî babete ANFyî rê ercnaye.

Kurkçuyî ard ziwan ke Erdogan babeta Sûrîye de Astana û Soçî de hetê Îran û Rûsya ra ameyo tengkerdene û vat: ''Înan eşkera vat ke seba operasyonê leşkerî do destûr nêdê Erdoganî. Hetê bînî ra Amerîka, Neteweyanê Yewbîyayeyan (NY) û Yewîya Ewropa (YE) zî Erdogan hişyar kerd ke gamêka winasêne ra abigêro. Sûrîye hînî neçare manena ke vera hêrişanê Tirkîya tewirê xo bimojna. Eke Tirkîya reyna hêrişê Sûrîya bikera Rojhelatê Mîyanênî de do alozîyêka pîle qewimîya. Coka hêzê pîlî xîret kenê ke Erdoganî ney ra biaçarnê.

Labelê rixmê nînan zî Erdoganî 'Konferansê Sersefîran ê 13.' de bi zelalî vat ke ê do herêmanê îşxalkerdeyan ê mabênê El Bab, Efrîn, Girê Sipî û Serêkanîyê girê bidê û 'kemerê asayî' awan bikerê. Pêvînayîşê Wezîranê Karanê Teberî yê Rûsya û Sûrîye de Moskova de mi çimî de hêzê Tirkîya qîm nêkerd ke çiyo ke Erdogan vano bikero û coka înan gamêka winasêne eşte. Hetê bînî ra pîlîya meseleya kurdan ra, Erdogan bi operasyonê leşkerî nêwazeno netîceyêka stratejîke îlahîm bivisno destî la wazeno bi dergkerdişê nê prosesî hetê sîyasîyî ra seba xo nê operasyonî bikero firsendêk. Erdogan keno ke weçînayiîşî ra verî îmajê xo yê 'westeyê şerî' bizêdîno. La seba ke teng mendo Erdogan neçar mendo ke gamêka winasêne berzo.''

Kurkçuyî bale ante dişmenîya dewletanê serdestan a vera kurdan ser û vat: ''Îran, Iraq, Sûrîye û Tirkîya pêro yewbînan d eşer bikerê zî dişmenîya vera kurdan ra fek zî vera nêdanê. Goreyê mi nîka îstîxbaratanê Tirkîya û Sûrîye mîyanê têkilîye de yê. Bêguman destê ma de delîlêk çin o la pêvînayîşî ney rê xizmet keno.Tirkîya seba ney pêro firsendan şuxilnena, Erdoganî zî bi 'ma pêvînayîşî kenê' no raşt kerd. La Sûrîye nika bîye xurt. Cergê ke Tirkîya çeke daya înan, Idlib de teng mendê. 

Sûrîye seba ke bîya xurtêr vat 'Heta ke Tirkîya erdê Sûrîye nêterikna asta lîderan de ma do dîyalogan bikerê.' Labelê no nêno a mana ke bi hawayêkê nimiteyî dîyalogî do nêrê kerdene. Tirkîya heta ke Sûrîye ra nêvejîya Esad do Erdoganî de pêvînayîş nêkero. Hetêkê bînî ra zî Tirkîya destê Rûsya de teng bîya. Mi çimî de Tirkîya û Rûsya hewceyê dîyalogan ê, Sûrîye nê. Çunke Sûrîye hînî paştîya xo daya cayêkê xurtî. Rûsya zî neçar a ke dewletanê Ewropa rê bimojna ke Tirkîya hetê ci de ya coka neçare ya ke hetkarîya bida Tirkîya. Tirkîya zî wayîrê zaf alternatîfan nîya ke serê rayîrê Rûsya de Sûrîye de şora.''