Wekîlê HDPyî Mehmet Ruştu Tîryakîyî derheqê vurîyayîşê qanûnê weçînayîşî yê AKP-MHPyî de ANFyî rê qisey kerd.

Tîryakîyî ard ziwan ke AKP û MHP wextêkê dergî ra nata qanûnê weçînayîşî ser o bi nimitkî nîqaşan kenê û vat: ''Înan her hetê weçînayîşî ser o nîqaş kerd. Qanûnê weçînayîşî yê neweyî de caardişê hewcedarîya komelkîye çin o. Wexto ke 2015 de HDP bendê weçînayîşî derbaz kerdbi şansê AKPyî nêmend ke bi sereyê xo bibo îqtîdar. 2018 de zî AKPyî waşt ke partîyêka sîyasîye bianco hetê xo la hesabê înan nêame ca. Îtîfaqê CHP, Îyî Partî, Saadetî ronîya. Hişê AKPyî 2018 de şi.

Heta weçînayîşî partîyê sîyasîy do goreyê na rewşe û stratejîya xo ya weçînayîşî xo revîze bikerê. Hînî mumkîn nîyo ke hesabê AKPyî yê ke sey planê muhendîsîye yenê kerdene, bêrê ca. HDP hem partîyanê Kurdîstanî hem zî hêzanê demokrasî reyde xebatan keno. Ma do zî stratejîya weçînayîşî revîze bikerê û xo weçînayîşî rê amade bikerê. Nê sereraştkerdişê qanûnê weçînayîşî demokratîk nîyo.''

Tîryakîyî îfade kerd ke eke partîyê sîyasîy û şar wayîrê sindoqan vejîyê hesabê îqtîdarî do bêrê pûçkerdene û vat: ''Ma sey HDPyî na babete de xebatê xo temam kerdî. Ma do endamanê xo yê heyetê weçînayîşî û mesuldaranê xo yê dibistanan zî eşkera bikerê. Ganî partîyê muxalefetî zî nê warî de hemkarîye pîl bikerê. Ma amade yê ke partîyanê muxalefetî reyde seba asayîşê weçînayîşî bixebitê.''