Wekîlê HDPyî yê Êlihî Mehmet Ruştu Tîryakîyî derheqê nîqaşanê 'muxatabê çareserîya meseleya kurdan kam o' de ANFyî rê qisey kerd.

Tîryakîyî ard ziwan ke cayê çareserîya meseleya kurdan Meclîs o û HDP na babete de çi bikewo milê ci do bikero. Tîryakîyî vat: ''Beşo ke Serekê CHPyî vato pêvînayîşê bi Abdullah Ocalanî meşrû nîyê û adresê çareserîya mesele HDP yo kêm o û problemin o. Hetêk de şero çekdar, koma têkoşinê çekdarî esta. Heta ke hetê çekdarî pêvînayîşî nêkerê qet yew mesele çareser nêbena.

CHPyî rolê Birêz Abdullah Ocalanî fam nêkerdo. Ercîyaye yo ke înan HDP sey hetêkê çareserîye dîyo la no nêno a mana ke çareserîya meseleya kurdan de têna yew het esto. Birêz Ocalanî bi xo vatbi ke heta ke statuyêko qanûnîn nêbo çareserî nêbena. Pê redkerdişê rolê Ocalanî zî çareserîye nêbena. CHP zî kadroyê ci zî zanenê ke bê dîyalogan, pêvînayîşan gamê ke do bêrê eştene ser nêkewenê.''

Tîryakîyî da zanayene ke çareserîya meseleya kurdan de HDP rolêkê kilîdî ano ca. Tîryakîyî vat: ''Eşkera yo ke ne îtîfaqê Cumhurî ne zî îtîfaqê Miletî bi sereyê xo do nêeşkê weçînayîşanê serekkomarîye de ser bikewê. Rewşa HDPyî zaf krîtîk a, dewaya qefilnayîşî zî wina ya. Armancê operasyonanê vera HDPyî no yo. Îqtîdaro sîyasî yo ke no rolê kilîdî dîbî semedê tasfîyeya HDPyî muracatê rayîran ê îlegalan keno.''