Tevgera Jinên Azad (TJA) startê çalakîyan 25ê Teşrîna Peyêne Roja Têkoşînê Vera Şîdetê Serê Cinîyan Qoserê Mêrdînî da. Xeylêk bajaranê Vakurê Kurdîstanî ra cinîyî û Wekîla HEDEPî ya Mêrdînî Salîha Aydeniz tewrê çalakîye bîyî.

Cinîyan ke waşt Meydanê Azadîye de rayraşîyayîş bikerê hetê polîsan ra gerîyayî binê ablûqa û desturê rayraşîyayîşî nêdîya. Cinîyan ke fotografê cinîyan ê ke ameyî qetilkerdene kirişti cayê xo de bi slogananê “Jin jiyan azadî”, “Bijî berxwedana jin a”  û tîlîlîyan waşt wa polîsî ablûqaya xo wedarê. Badê muzakereyan cinîyan meydan de eşkerayîye daye. Eşkerîye bi nêameyê cinîyan hetê aktîvîsta TJA Jiyane Oner ra ameye kerdene.

Jiyane Oner ard ziwan ê do semedê azadkerdişê keda cinîyan têkoşînî xurtêr bikerê û vat, Îqtîdaro ke wazeno verê têkoşînê cinîyan ê heqdarî bîgêro tecrîdê serê Rayberê Şarê Kurdî Abdullah Ocalanî xorîyêr keno. Pîya bi xorîkerdişê tecrîdî problemê komîlî zî zêdîyenê. Adresê çareserkerdişê meseleya kurdan û kaosê Tirkîya Abdullah Ocalan o. Ma qerardarê ke tecîrî bişiknê û cuya azade înşa bikerê. Ma bi  ‘jin jiyan azadi’  heme cinîyan ê dinya de têkoşînê xo kenê yew.  Ma veng danê cinîyan ke wa 25ê Teşrîna Peyêne de vejîyê waran û têkoşînî xurtêr bikerê.”

Salîha Aydeniz zî vist vîrî ke na roja têkoşînî bi bedalanê girdan ê cinîyan ameye destfînayene û vat,Ma vera zîhnîyetê mîlîtarîst, cînsî yê camêrd-dewlete no têkoşîn a roje ra heta ewro kirişt. Ma do tim kuçeyan de bê. Yeno waştene ke Kurdîstan de şîdetê uniformayinan zêdêr bikerê. Şarê kurdî do vera nê polîtîkayan têkoşîn keno. Şîdetê vera cinîya  bi destê dewlete yêno kerdene. Ma zî do vera nê bi slogana ‘jin jiyan azadî’ do kuçeyan de bê. Têkoşînê ma sere de vera tecrîdî yo. Şima nêeşkenê têkoşînê cinîyan bişiknê.  Hema ke ma îtîfaqê cinî û komelî bîyarê ca ma do têkoşînî rê dewam bikerê.”