Têgêrayîşê Cinîyan ê Azadan (TJA) û Meclîsê Cinîyan ê HDPyî şaristananê Mersîn û Riha de startê çalakîyanê 25ê Teşrîna Peyêne Roja Têkoşînê vera Şîdetê Serê Cinîyan da.

Mersîn de TJA û Meclîsê Cinîyan ê HDPyî Parka Barişî de eşkerayîye daye, posterê Denîze Poyraz akerdî û sloganê 'Biciwîyo têkoşînê cinîyan' vat. Hemsereka HDPyî ya Mersînî Gulbahare Şofer çalakîye de qisey kerd û da zanayene ke ê do pêro waran de vera hişmendîya serdestîya camêrdan û pederşahîye têkoşînê xo dewam bikerê. Şofere vat: ''Ma do meydanan de têkoşînê xo pîl bikerê û cuya newîye awan bikerê.'' Eşkerayîye pê çepikan qedîyaye.

Riha de TJA qeraxê Çemê Firatî de çalakîyêke kerde. Meclîsê Mayanê Haştîye, Wekîla HDPyî ya Riha Ayşe Surucu, endamê Meclîsê Cinîyan ê HDPyî zî tewrê çalakîye bîyî. Cinîyan çalakîye de qurdelaya more ra zincîr viraşt. Ayşe Surucu çalakîye de qisey kerd û îfade kerd ke cinîyî pê betalbîyayîşê Peymana Îstanbulî bêpawitişî vera dîyayî. Ayşe Surucu cezaya zîndanî ya vera Ayşe Gokkan zî şermezar kerde û vat: ''Ma do heta peynî semedê heqê pawitişî meydanan de bibê.'' Cinîyan dima balonê morî pernayî, sloganê 'Cinîye, Cuye, Azadîye' vat û tîlîlî kerdî.