Serekê DYA Donald Trumpî paştdayîşê malî yê Rêxistina Weşîye ya Dinya (WHO) birna ke Trumpî WHO sûcdar kerdêne ke pandemîye bi hawayêkê xirabî îdare kerde. Neteweyanê Yewbîyayeyan zî bi vatîşê ''Wextê ci nîyo'' nêrazîbîyayîşê xo mojna.
Serekê DYA Donald Trumpî roja sêşemeyî pê eşkerayîyêke WHO sûcdar kerd ke têkoşînê vera pandemîya vîrusê Korona xirab îdare kerd.
Trumpî da zanayene ke îdarekerdişê xirabî yê pandemîye û rolê WHOyî ser o tehqîqat da destpêkerdene û talîmat da ke paştdayîşê malî yê Amerîka yê seba WHOyî bêro vindartene. Trumpî îfade kerd ke DYA her serre 400î ra heta 500 mîlyon dolarî hetkarîye dana WHO û vat Çîn nêzdîyê 40 mîlyon dolarî dano.
Trumpî vat: ''Eke WHOyî karê xo bikerdêne û seba cigêrayîşê objektîfî yê rewşe pisporanê xo bierşawitêne Çîn, jan do biameyêne kontrolkerdene.''
Serekê DYA hewteyanê peyênan de zaf rey bi hawayêkê xurtî WHO sûcdar kerd û îdîa kerd ke WHOyî Çînî reyde têgêreno.
Sekreterê Pêroyî yê Neteweyanê Yewbîyayeyan Antonio Guterresî vera eşkerayîya Trumpî nêrazîbîyayîşê xo mojna û vat: ''Ganî WHOyî rê paştî bêro dayene ke no seba serkewtişê şerê vera Korona zag girîng o. Nika wextê ci nîyo.'' Guterresî ard ziwan ke ganî nê wextî de komelo mîyanneteweyî pîya têbigêro.
