Hemsereka verêne ya Partîya Herêman ê Demokratîkan (DBP) Sebahate Tuncel 6ê teşrîna peyêne ya 2016î de amebî tepiştene. Tuncela ke Zîndanê Kandira de tepişîyena rixmo ke cezaya ci ameye betalkerdene vera nêdîyaye. Derheqê Tuncele de 12ê teşrîna verêne de çarçewa 'tehqîqatê Kobanê' de reyna bira tepiştişî dîyaye.

Sebahate Tuncel bi rayîrê avûkatanê xo cewab da persanê ANFyî.

Tuncele derheqê tehqîqatê Kobanê de wina qisey kerd: ''Operasyon û tepiştişê Kobanê neticeya polîtîkaya dişmenîya kurdan a îqtîdarî ya. Serra 2014î de Erdoganî masaya dîyalogan rijnaye û Planê Rijnayîşî vist dewre. Bi nê hawayî tecrîdê vera Birêz Ocalanî ame xorinkerdene. Meseleya kurdan hetê polîtîk û ekonomîkî ra zaf tesîrê Tirkîya kerd. Îqtîdarî darbeya 15ê temmuze bahane kerde û rejîmê xo kerd zixmêr. Nê prosesî de bi polîtîkaya qeyûmî dest nîya îradeyê kurdan ser. Bi tehqîqatê Kobanê îqtîdar kurdan ra qesasê xo yê binkewtişê Kobanê gêno. Mesuldarê serebûtanê Kobanê bi xo îqtîdar o. Polîtîkaya 90an a dewlete dewam kena. Nika zî sîyasetmedarî tepişîyenê,vera sivîlan hêriş, tacîz, tecawuz, îşkence yenê kerdene, sivîlî helîkopterî ra erzîyenê. Dewlete hema zî sûcdaran pawena. La kurdî sey serranê 9an vera nê kerdişan têkoşîn kenê û xo ver danê. HDP ewro partîyanê tewr pîlêran ê Meclîsî ra yew o. Pê nê tepiştiş, destbendkerdiş û hêrişan ê xîret kenê ke hêzê HDPyî asteng bikerê.''

Sebahate Tuncel ard ziwan ke îtîfaqê cumhurî pê tedayan payan ser o yo û vat: ''Îqtîdar prosesê pandemî zî seba menfaatanê xo xebitneno. Îqtîdar bi teda û zorî komel îdare keno. Ganî hêzê muxalefetî vera na rewşe bêrê têhet. Bi taybetî serra 2015î ra naya AKP hînî nêeşkeno bi sereyê xo komel îdare bikero. Coka AKPyî MHP, Ergenekon, neteperest û îslamîstanê radîkalan reyde Îtîfaqê Cumhurî na ro. Bingeyê nê îqtîdarî de dişmenîya kurdan esta. Devlet Bahçelî zî hemserekê nê îqtîdarî yo. MHP hem pê fikrê xo hem zî pê kesayetê xo îqtîdar de yo.''

Sebahate Tuncel îfade kerd ke AKP cinîyan ê kurdan keno hedef û vat: ''AKP vera cinîyan ê kurdan polîtîkaya şerê taybetî ano ca. Bi taybetî Dêrsim, Şirnex, Êlih de tacîz, tecawuz, şîdet, vînîkerdişî, qirkerdişê cinîyan zêdîyayî. Nê pêro netîceya na polîtîkaya îqtîdarî ya. Kampanyaya TJA ya 'Ma xo pawenê' zaf girîng a. Çunke ganî cinîyî xo bi xo bipawê. Ganî cinîyî pêro waran de xo rêxistin bikerê, paştdayîş pîl bikerê. ''

Tuncele peynîya qiseykerdişê xo de wina vat: ''Îradeyê kurdan hetê polîtîkaya qeyûmî ya îqtîdarî ra 2 reyî ameyî xespkerdene. AKP çend pê qeyûman şaredarîyanê ma îşxal bikero û polîtîkaya zulm û zorbazîye bîyaro ca zî kurdî do waştişanê xo ra fel vera nêdê. Polîtîkaya qeyûmî îlanê mergê demokrasî, heq û azadîye yo. Pêro xîretê îqtîdarî bîlasebeb ê. Polîtîkaya qeyûmî, destbendkerdiş, tepiştiş û zulmî nêeşkenê têkoşînê ma asteng bikerê. Eqsê ci nê polîtîkayî bawerî û îradeyê ma kenê pîlêr.''