Dewa Hecîya Jor ya qezaya Hewangî ya Riha de amebi îdîakerdene ke şer qewimîya û endamê HPGyî Ferhat Tunç (31) şer de şehîd bîyo. Cenazaya Tunçî hetê keyeyê ci ra ameye girewtene û ameye berdene bi qezaya Serêkanîyê ya Riha.

Serêkanîyê de polîsan nêverda ke cenaza bêra şitene û wezîceyê dînî bêrê kerdene. Cenaza Goristanê Asrî de ameye definkerdene. Polîsan nêverda ke 5 endamanê keyeyî ra ber kes tewrê merasîmê definkerdişî bibo.

Keye banê xo yê taxa Fatîh Sultan Mehmetî de şîn naro. 

Wezîrîya Karanê Zereyî îdîa kerd ke Tunç şer de şehîd bîyo. Keye vano ke bedenê lajê înan ser de têna rêçê guleyêkî esto û beno ke lajê înan ameyo înfazkerdene.  

Vizêr dima ke Wezîrê Karanê Zereyî Suleyman Soyluyî serebût vila kerd, CNN Turkî xebere de fotografê hunermend Ferhat Tunçî serwîs kerdbi. Hunermend Ferhat Tunçî vera CNN Turkî nêrazîbîyayîşê xo mojna û vat o do gerreyê xebere bikero.