Heqanê Merdiman (ÎHD) Ozturk Turkdoganî tedaya heqanê merdiman a serra 2019î ser o ANF reyde qisey kerd. Turkdoganî vat eke dewaya kurdan de prosesêkê haştîye bêro destpêkerdene sîyasetê Tirkîya zî do zemînê demokrasîyî de bêro têhet.

Turkdoganî ard ziwan ke çareserkerdişê dewaya kurdan û tecrîdê Îmraliyî emser zî bîyî tedayanê giranan ra yew û vat wextê haştîye û çareserîye de tecrîdê Îmraliyî yeno wedaritene la wextê şerî de no tecrîd reyna vejîyeno meydan.Turkdoganî qala grevê vêşanîye kerde ke Hemsereka KCDyî û wekîla HDPyî Leyla Guven seba wedaritişê tecrîdê Rayberê Şarê Kurdî Abdullah Ocalanî dabi destpêkerdene. Turkdoganî da zaneyene ke goreyê tesbîtanê ÎHDyî 9 zîndanan de 3 hezar û 65 tepişteyî kewtbî grevê vêşanîye yê bêmabên û bêagêreyîşî.

Turdoganî îfade kerd ke serra 2019î de binpaykerdişê heqanê merdiman bîyî zêde û vat: "Kapasîteyê zîndananê Tirkîya 220 hezar o la nika 290 hezar tepişteyî estê. 500 tepişteyî nêweê giranî yê ke ganî nê nêweşî bêrê veradayene. Surgun û cezaya girane ya dîsîplînî estê. Îşkenceyê giranî û têgêrayîşê xirabî yê vera tepişteyan zî zaf ê." Turkdoganî qala operasyonanê vera muxalefetê kurdan kerde û vat: "Nika zîndanan de zaf sîyasetmedarê kurdî, çalakîkerî, nuştoxî, endamê sendîkayan û pawitoxê heqanê merdiman estê. Zaf îdarekarê HDPyî zî ameyî tepiştene."

Turkdoganî behsê qeyûman kerd û vat ke qeyûm yeno manaya binpaykerdişê qanûnê bingeyî û vat: "Nê îqtîdarî yo ke dest na şaredarîyanê HDPyî tewr peyêne dest na şaredarîya CHPyî ya Urla. Nika zî ma vînenê ke seba destsernayîşê şaredarîyanê pîlan amadekarîye keno. Îqtîdar çiyo ke nêeşkeno bi qanûnê bingeyî biko bi qerarnameyan keno. Îtîdaro nîkayên nêeşkeno na rewşa hîna zêde dewam biko. Ganî sîyasetê Tirkîya zemînê demokrasîyî ser o bêro têhet. Seke weçînayîşanê herêmîyan de ame kerdene ganî îtîfaqê demokrasîyî bêro kerdene û qanûno bingeyî yo newe bêro awankerdene. Coka hêvî kena ke muxalefetê sîyasî û komelî bingeyê heqanê merdiman ser o bêrê têhet û pîya Tirkîya de proseso newe bidê destpêkerdene."