Hêrişê îşxal û qirkerdişî yê vera Başûrê Kurdîstanî dewam kenê. Dewleta tirke ya ke verê gerîlayan de bi giranî bin kewena, kena ke binkewtişê xo binimna. Umît Ozdagî dewleta tirke zûrker vete.

Serekê partîya faşîste ya bi nameyê 'Zafer Partisi' Ozdagî çalakîya partîya xo ya Îstanbulî de îtîraf kerd ke menga temmuze de 3 leşkerî merdê la Ozdagî îtîraf kerd ke 44 leşkerê tirkî kişîyayê.

Ozdagî qiseykerdişê xo de wina vat: ''Emser teyna temmuze de Vakurê Iraqî de, herêma Pançe-Kîlîtî de ma 44 şehîdî dayê, tewr tay 10 leşkerê ma zî birîndar bîyî.''

Wezîrîya Pawitişî ya Tirkîya rîpelê xo de îdîa kerdbî ke temmuze de 5 leşkerê înan merdê.

Merkezê Îrtîbatî û Çapemenîye yê HPGyî zî bîlançoya şerî ya temmuze de pare kerdbî ke a aşme 56 îşxalkerî ameyê cezakerdene.