Vizêr merkezê ci Pazarcixê Mereşî de bi girdîya 7.8î de erdlerz qewimîya û dima ra Elbîstan de bi girdîya 7.7î de yewna erdlerz qewimîya. Wird erdlerzan zî Lazkiye ra heta Meletî û Mereşî ra heta Amedî warêkê hîra de rijnayîşo gird ame meydan.

Goreyê eşkerayîyanê selahîyetdaranê dewleta tirke erdlerzan de heta nika  3 hezar û  381  kesan dinyaya xo bedilnaye.20 hezar û 426 kesî birîndar bîyî. 6 hezar û 217 bînayî rijîyayî û hema bi hezaran kesî binê rijnayîşî de yê. Şertê hewayî zî xebatanê xelisnayîşî sero tesîro xirab keno.

Çimeyê herême vanê ke bi hezaran kesan dinyaya xo bedilnaye, dewleta tirke hûmara raşte nimnena.

AFAD badê 15 saetan ame Bazarcix

Ekîbê AFADî badê 19 saetan ameyî Bazarcix. Ekîbî çar bînayan de xebate kenê la bi desan bînayan de xebatî nînê kerdene. Hemwelatîyî bi îmkananê xo xebatanê xelisnayîşî kenê. Nêweşxaneyê Dewlete rixmo ke xesarin o xizmet dano. Cenazayê 60 kesan tîya de yenê pawitene.

Hatay de 520 kesan dinyaya xo bedilnaye

Hatay de 520 kesan dinyaya xo bedilnaye û 700 kesî birîndar bîyî. Bajaro ke hezar  û 278 bînayî rijîyayî de hema ekîbê hetkarî nêrasayî ci.

Yeno vatene ke Antakya, Kirikhane, Defne, Samandag, Îskenderun de bi des hezaran kesî binê rijnayîşî de mendî. Bajar de bînayêke zî nêmenda ke merdim tede bimano.

Dîlok de 533 bînayî rijîyayî

Dîlok de heta nika 533 bînayî rijîyayî û 200 kesan dinyaya xo bedilnaye. Merkezê û qezayanê Nurdag, Îslahiye û Şehîtkamilî de hema xebatê cigêrayîşî dewam kenê. Rayîrê Dîlok-Nurdagî ame qefilnayene.Xeylêk cayanê bajarî de ceyran çîn o û vizêrna awe pesayîya. Şar kuçeyan de adir tafîneno û xo germin keno.

Semsûr qederê xo rê ameyo caverdayene

Semsûr de xebatê xelisnayîşî nêameyî destpêkerdene. Bajaro ke bi seyan bînayî rijîyayî de şar pê îmkananê xo xebatanê xelisnayîşî keno. Zereyê roje de bi desan kesî binê xirabeyan ra ameyî vetene û yeno vatene ke bi seyan kesî hema binê xirabeyan de yê. Bajar de ceyran çîn o, şebekeyê xeylêk xetanê telefonan birnayeyî û malzemeyê xida kêm ê.

Nîmeyê Elbîstanî rijîya

Erdlerzê diyînî de nîmeyê bînayanê Elbîstanî rijîyayî ya zî  xesarî ra çew neêşkeno tede bimano. Qeza de hûmara merdeyan merheleya girane de ya. Dewan de zî xesaro gird est o, şar vano ekîbê xelisnayîşî nêresayê ci.

Amed de rijnayîşo gird

Amed de qezayanê Rezan, Bajarê Nû, Peyas  de 7 bînayê ke rijîyayî de xebatê cigêrayîş û xelisnayîşî dewam kenê. Goreyê doneyanê peyênan 49 kesan dinyaya xo bedilnaye û 562 kesî birîndar bîyî.

Bajar de cayê kombîyayîşî wina yê:

"Koşuyolu Parkı, Körhat Parkı, Batıkent, Newroz Parkı, Kent Meydanı, Park 75, Tema Parkı, Park Orman Dicleket, Talaytepe Amedspor Kompleksi, Tenis Kortu, Halit Gülser Spor Kompleksi, Ayaz Düğün Salonu, Öner Koleji, Kaplan Açelya Düğün Salonu, Nesibe Aydın, Kevrim Koleji, Lider Koleji, Ekvator Akademi Koleji, Amerikan Kültür, Ortadoğu Koleji, Dağkapı Meydanı, Demirok Düğün Salonu, Diyarbakır Fuar Alanı, Anıt Park, Seyrantepe Toki Park, Seyrantepe Spor Kompleksi, Sümer Park, Gen Koleji, Eğitim Birimleri, Radikal Okulları, Düşünür Koleji, Öner Koleji Anemon Otel, Doğa Koleji, Kariyer Okulları, Ted Koleji."

Riha de 60 bînayî rijîyayî

Riha û qezayanê ci Hewaq, Bercûk, Pîrsûs de 60 bînayî rijîyayî. Qezayanê merkezî Haliliye û Eyubiye de tewr tay 20 bînayî rijîyayî. Qezayanê teberî de zî 40 bînayî rijîyayî û xeylê kesî binî rijnayîşî de mendî.

Erdlerzî tesîrê Rojawanî zî kerd

Erdlerzî tesîrê bajaranê Rojawanî zî kerd. Taxa Şexmeqsudî ya Helebî de 6 kesan dinayaya xo bedilnaye.