Amed

Amed de serkêşîya KCD, TJA, DBP, HDP, MEBYA-DER, TUAY-DER, OHD, Xîretê 78an de bi şîarê 'Ma ver bi azadîye şinê' çalakîyêka rayraşîyayîşî ameye kerdene. Wexto ke girseyê çalakîye resa Kuçeyê Emekî polîsan girse girewt binê ablûqa. Girseyo ke tede Hemsereka DBPyî Salîha Aydenîz, Serekwekîla HDPyî Merale Daniş Beştaş, Vervatoxa Meclîsê Ciwanan ê HDPyî Dêrsime Dag, Wekîlê HDPyî Erdal Aydemîr, Îmam Taşçier û Ozleme Gunduz zî tede bîyê, ablûqaya polîsan şermezar kerde.

Astengkerdişê polîsan ser o ciwanan Kuçeyê Sakarya de rayraşîyayîş da destpêkerdene û vera sloganê sey “Bijî Serok Apo”, “Jin, jiyan, azadî” û “Bijî berxwedana zindanan” berz kerdî. Hêrişê polîsan ra dima Hemserekê HDPyî yê Amedî Zeyat Ceylan û Gulîstane Atasoy û Hemserekê HDPyî yê Amedî Hayrettîn Altun zî tede tewr tay 10 kesî ameyî destbendkerdene.

Çalakîye de Merale Daniş Beştaş vera ablûqa nêrazîbîyayîşê xo mojna û îfade kerd ke îqtîdarê AKP-MHPyî hende şarî ra terseno ke xîret keno pê ablûqayan verê şarî bigêro. Hemsereka DBPyî Salîha Aydenîz zî Komployo Mîyanneteweyî şermezar kerd û vat: ''Komplo bi tecrîdî dewam keno la çareserîye bi Abdullah Ocalanî mumkîn a. Ablûqa û tedayî çend giran bibê zî ma do seba azadîya Birêz Ocalanî heta peynî têkoşîn bikerê.''

Serkêşîya KCD, TJA, HDK, DBP, HDP û xeylêk rêxistinanê komelê sivîlî de bi şîarê 'Ma ver bi azadîye şinê' Wan de çalakîya rayraşîyayîşî ameye kerdene. Mudirîya Asayîşî ya Wanî warî girewtî binê ablûqa û girseyî 3 baskan ra rayîr a şîyî. Baskêk de Hetkarê Hemserekanê HDPyî Tayîp Temel û Wekîlê HDPyî Sezaî Temellî, ê bînî de zî Murat Sarisaç û Muazzez Orhanî ca girewt. Pêro kuçeyî hetê polîsan ra gêrîyayî binê ablûqa. Rixmê ablûqa zî wekîlan û girseyî rayraşîyayîş kerd û dest pê çalakîya roniştişî kerd.

Polîsan hêrişê girseyî kerd û tewr tay 40 kesî destbend kerdî.

Sezaî Temellîyî çalakîya roniştişî de venga şarî da verê bînaya HDPyî ya Wanî de kom bibo. Şar wexto ke verê HDPyî de ame pêser Temellîyî qisey kerd û bale ante ser ke walîtî û polîsan pîya înan rê zulm kerdo û hişmendîya faşîstan tehamulê çalakîya şarî nêkena. Temellîyî dima vist vîrî ke vera Ocalanî tecrîdêko giran est o û vat: ''Netîceya tecrîdî de têna hîna zaf gonîye rijîyaye la çareserîye nêameye. Muxatabê çareserîye Abdullah Ocalan o. Coka ma do nê tecrîdî zî faşîzmî zî do birijnê.''

Mêrdîn-Qoser

Qezaya Qoserî ya Mêrdînî de hetê DBP, TJA, HDP, MED-TUHADFED û MEBYADERî ra çalakîya rayraşîyayîşî ameye kerdene. Rayraşîyayîşî ra verî war gêrîya binê ablûqa. Polîsan waşt ke girse vila bikero la girse vera sloganê 'Biji Serek Apo' vat û çepikî dayî piro. Mabênê polîsan û Wekîlanê HDPyî Ebru Gunay û Peroye Dundar de nîqaş vejîya.

Rayraşîyayîşî ra dima Hemserekê HDPyî yê Qoserî Fatîh Ozturk qisey kerd û komplo şermezar kerd. Ebru Gunay zî îfade kerd ke vera polîtîkayanê tecrîdî waştişê înan azadîya Ocalanî ya. Wekîle Peroye Dundar dîyar kerd ke Rayberê Şarê Kurdî Abdullah Ocalanî bi tewir û têkoşînê xo komplo pûç kerdo û ewro zî komplo bi xoverdayîşê Jîna Emînî reyna ameyo pûçkerdene.

Agirî-Bazîd

Qezaya Bazîdî ya Agirî de çalakîyêka rayraşîyayî ameye kerdene. Wekîlê HDPyî Dîlane Dîrayet Taşdemîr, Şevîne Coşkun, Hemserekê KCDyî Berdan Ozturk û xeylêk kesî tewrê çalakîye bîyî. Berdan Ozturkî çalakîye de qisey kerd û bale ante ser ke 24 serrî yo tecrîdê vera Abdullah Ocalanî dewam keno. Ozturkî vat: ''Rayîrê haştî, demokrasî û azadîye Îmraliyî ra derbaz beno. Ma tecrîdî şermezar kenê. Ma soz danê ke heta ke Birêz Ocalanî azad bibo ma do têkoşîn bikerê.''

Dîlok

Çalakîya Dîlokî hetê DBP û HDPyî û Têgêrayîşê Cinîyan ê Azadan (TJA) ra ameye serûberkerdene. Parka Yeşîlsuyî de eşkerayîye ameye wendene. Hemserekê HDPyî yê Dîlokî Avnî Bînîcîyî eşkerayîye wende û vat ke waştişo verên ê şarê kurdî wedarnayîşê tecrîdê Îmraliyî yo.

Semsûr

Semsûr de zî endamê TJA, HDP, Partîya Keske û xeylêk roniştoxê herême tewrê çalakîye bîyî. Eşkerayîye de pankarta 'tecrîd sûcê vera merdimîye yo, wa wedarîyo' ameye akerdene. Eşkerayîye pê sloganan qedîyaye.

Riha

Riha de serkêşîya HDP û DBPyî de çalakîya şermezarkerdişî ameye kerdene. Wekîlê HDPyî û Platformê Kede û Demokrasî zî tewrê çalakîye bîyî. Polîsan waşt dest nê pankarte ser la şarî nêverda û eşkerayîya xo daye. Wekîlê HDPyî Siddik Taşî îfade kerd ke Ocalanî komplo pûç kerdo. eşkerayîye ra dima girseyî dest pê rayraşîyayîşî kerd. Polîsan girse girewt binê ablûqa la girseyî ablûqa derbaz kerde û bi sloganê "Bijî berxwedana Îmrali" rayîr a şi. Polîsan hêrişê girseyî kerd û kesê bi nameyê Hatîce Goktepe û Omer Kistak destbend kerdî.

Şirnex-Cizîre

Cizîre de serkêşîya DBP, HDP, TJA ve MED TUHAD-FEDî de çalakîya rayraşîyayîşî ameye kerdene. Wekîlê HDPyî Nurane Îmîr, Hasan Ozguneş, Meclîsê Mayanê Haştîye û TJA tewrê çalakîye bîyî. Rixmê astengîyan zî girseyî bi sloganan çalakîya xo kerde û verê bînaya HDPyî de ame pêser. Nûrane Îmîr tîya de qisey kerd û da zanayene ke komplo bi destê NATOyî ameyo kerdene û vat: ''Tecrîd de israr komplo yo. Ma vanê şima nêeşkenê tîja ma tarî bikerê.''

Adana

Adana de çalakîye ra verî polîsan bînaya HDPyî girewte binê ablûqa. Dima wexto ke girse bînaya HDPyî ra vejîyayêne hêrişê înan kerd. Polîsan xeylêk kesî birîndar kerdî la girseyî ancî zî eşkerayîya xo daye. Hemserekê HDPyî yê Adana Mehmet Karakişî polîsî protesto kerdî û venga pêro hêzanê demokratan da ke vera tecrîdî têbigêrê.