Hukmatê Almanya 26ê teşrîna peyêne ya 1993î de pêro kar, têgêrayîş û xebatê PKKyî qedexe kerdî. 

Înîsîyatîfê 'Qedexeyê Vera PKKyî Wedarnê' yo ke tede 54 dezgehê kurd, alman û koçberan ca gênê keyepel û hesabê ci yê medyaya dîjîtale ameybî blokekerdene. Înîsîyatîf nê adresî https://verbotaufheben.noblogs.org ser o xebatanê xo rê dewam keno. 

Înîsîyatîfî bi eşkerayîyêke da zanayene ke 28 serrî yo qedexeyê vera PKKyî dewam keno, bi nê qedexeyî kurdî û têkoşînê kurdan yenê krîmînalîzekerdene. 

Înîsîyatîfî pare kerd ke na menge vera qedexeyê serê PKKyî Bonn, Dresden, Hannover, Mahdeburg, Kassel, Luneburg, Aachen, Gottîngen, Frankfurt, Halle, Bremen û Hamburg de tay panelî kerdî.  Panelan de huqûqnas, mexdûr û pawitoxanê heqanê merdiman qala zerarê qedexeyê vera PKKyî ser o qisey kerd.

Înîsîyatîf vera qedexeyî 27ê teşrîna peyêne de paytextê Almanya Berlin de bi şîarê 'Wa qedexeyê vera PKKyî wedarîyo/ Şerî biqedînê, çareya sîyasîye bigêrê' çalakîya rayraşîyayîşî û nawnayîşî do bikero. 

Rayraşîyayîş Hermannplatz de saete 12:00 de do dest pêbikero.

Înîsîyatîfî venga pêro kurdan û demokratan da ke tewrê çalakîya Berlinî bibê û vat: ''Qedexeyê vera PKKyî yeno manaya destekê şerê dewleta tirke yê vera kurdan. Wextê ci ameyo ke bira qedexeyî wedarîya.''