Partîya Demokrasîyî û Têduştîye ya Şaran (DEM Parti) qerar girewt ke do çalakîyanê nobete yê ke ver destsernayîşê Şaredarîya Colemêrgî dîyayî despêkerdene, hîra bikero. Çarçewaya planê çalakîyan ê vera qeyûmî de  Îstanbulî ra heta Colemêrgî do têkoşîn bêro xurtkerdene. 

Goreyê planê neweyî Îstanbul û Colemêrg de do çalakîyê nobetê dewam bikerê. Serhedî ra do grûbê cîya cîyayî tewrê nobeta Colemêrgî bibê. Bajaranê bînan de zî do hewte de rayêke çalakîye bêro kerdene. Heyeto ke vera destsernayîşî ame pêardene do Anqara û Îstanbul de pêvînayîşan bikero û 29ê hezîrane de tewrê mîtîngê Îstanbulî bibo. 30ê hezîrane û 1ê temmuze de do pêvînayîşî bêrê kerdene.

DEM Partî vera qeyûmî do rayraşîyayîşê gidî organîze bikero. 30ê hezîrane de Îstanbulî ra ver bi Colemêrgî Rayraşîyayîşê Îradeyî rê Hurmet do rayraşîyayîş bêro destpêkerdene. Her bajarî de do tewerbîyayîşê neweyî bibê. Kocaeli, Bursa, Tekirdag, Edirne, Çanakkale, İzmir, Aydin, Denizli, Mugla, Manisa, Antalya, Ankara, Konya, Eskişehir, Kayseri, Adana, Mersin û Hatay de do grûbê neweyî tewrê rayraşîyayîşî bibê.

Bajaranê Kurdîstanî ra do dahîna zaf kesî tewrê rayraşîyayîşî bibê.Dîlok, Meletî, Mereş, Semsûr, Riha, Elih, Amed, Sêrt, Çewlîg, Dersîm, Xerpêt, Elezîz, Merdîn, Şirnex, Qers, Erdexan, Îdir, Erzirom, Agirî, Bedlîs û Mûşî ra tewrbîyayoxî do 3ê temmuze de Wan de bêrê têhet û tîya ra pêro pîya verê xo bidê Colemêrgî. Yeno pawitene ke rayraşîyayîş do şeş rojî dewam bikero.