Dima ke sersefîranê 10 welatanê Ewropa waşt ke merdimê karî Osman Kavala bêro veradayene Erdoganî semedê sînorî ra teberkerdişê înan ferman da. Vera fermanê Erdoganî nêrazîbîyayîşî zêdîyenê.

Serekê Parlamentoyê Ewropa (PE) David Sassoliyî bi hawayêkê tûjî vera Erdoganî nêrazîbîyayîşê xo mojna û vat: ''Sînorî ra teberkerdişê 10 sersefîran mojneno ke hukmatê Tirkîya beno otorîter. Ma do mevisîyê. Osman Kavaliyî rê azadîye.

Fermanê Erdoganî medyaya Rojawanî de zaf veng vet. Hêverî Swêd û Norweçî nêrazîbîyayîşê xo mojna. Selahîyetdaranê wird welatan zî pare kerd ke xebera înan pê çin a ke sersefîrê Tirkîya welatî ra şîyê. 

Dîrektorê  Hukmatê Norweçî yê Têkilîye ra Berpirsîyar Trude Maseideyî vat: ''Sersefîranê ma kerdişêko winasên heq nêkerd.''

Wezîrê Karanê Tenerî yê Almanya îfade kerd ke ê hê bi hawayêkê giranî selahîyetdaranê 9 welatan ê bînan reyde têkilîye de yê.

Wezîrîya Karanê Teberî ya Danîmarka vat: ''Zanayîşêko winasên nêresa ma ke sersefîrê ma Tirkîya ra do bêro eştene. Ma do krîter û erjanê xo yê hemmparan ser o hîsgerîya xo rê dewam bikerê.''

Parlamentera Hollanda û Raportora Verêne ya Tirkîya Kati Piri zî hesabê xo yê medyaya dîjîtale ser o paştî daye 10 sersefîran. Pari eşkera kerd ke ganî Anqara biranê Mehkemeya Heqanê Merdiman a Ewropa bîyara ca û Yewîya Ewropa zî paştî bida nê sersefîran.

Rojnameyê namdarî yê Almanya Bildî kerd manşet ke Erdoganî senî sersefîrî kerdî hedef. Bildî xebera xo de vat: ''Ma zaf halanê Erdoganî musayî. O tim tewrê xo yê otorîter û tedakerî dibare keno. Zanîyeno ke Erdogan eleqe nêmojneno heqanê merdiman, şino serê muxalîfan û rexnegîran. Heqê cinîyan û serdestîya huqûqî ci rê girîng nîyê.''