Dewleta tirke ya îşxalkere 17ê nîsane de vera Herêmanê Pawitişî yê Medya bi hemkarîya PDKyî hêrişê îşxalî dabî destpêkerdene. Vera hêrişanê îşxalî nêrazîbîyayîşî benê pîl. 

Xeylêk parlamenter û rojnamegeran vera hêrişanê îşxalî yê Tirkîyaya ke qaşo şerê Ukrayna-Rûsya de mabênçîtîye kena, nêrazîbîyayîşê xo mojna û Tirkîya sey 'dirîye' pênase kerde. Nê kesan da zanayene ke nê hêrişî pê paştdayîşê NATOyî yenê kerdene.

Partîya Keskan ra Vervatoxa Komîsyonê Karanê Teberî yê Parlamentoyê Ewropa Ewa Ernst-Dziedzic twitterê xo de vat: ''Şerê Ukrayna ra dima Tirkîya Başûr de vera milîsanê kurdan hêrişî dayî destpêkerdene. Erdogan şerê Rûsya-Ukrayna de xo sey mabênçî mojneno la sînorê cîranê xo binpay keno. Kerdişê Erdoganî dirîtî ya.''

Partîya Keskan a Almanya ra Wekîl Max Lucksî hesabê xo yê twitterî de vat: ''Tirkîya bi serran o vera Herêma Kurdîstanî operasyonêkê leşkerî yê giranî kena. Tirkîya pê nê têgêrayîşê xo yê îlegalî NATO û xo rê zerar dana. Ganî nê hêrişê îlegalî cade vinderê. Meseleya kurdan seba çareserîye hewceyê dîplomasî û sîyasetî yo.''

Mudirê Pêroyî yê Weşanîye yê ARDyî George Restleyî zî hesabê xo yê twitterî de vera bêvengîya rojnamegeran nêrazîbîyayîşê xo mojna û wina vat: ''Embazê min ê rojnamegerî yê ercîyayeyî, her çiqas ma eşkenê xo biresnê xeberanê şerê Rûsya-Ukrayna, şerê Tirkîya yê vera kurdan ganî seba ma binnotêkî ra ercîyaye bibo.''