Tepişte Gazî Muratogluyî bi rayîra dadîya xo Hanim Muratoglu 18ê kanûne de binpaykerdişê heqan ê Zîndanê Tarsûsî pare kerdî. Muratogluyî da zanayene ke zîndan de nêweşî nênê weşkerdene, bi taybetî nêweşan Nesîp Yapiciyî û Mustafa Abîyî çend sewqê nêweşxaneyî waşt zî waştişê înan nêame caardene.

Muratoglu Zîndanê Tarsûsî de heqê tepişteyan senî yenê binpaykerdene wina qala ci kerd:"Wexto ke ma îdare reyde qisey kenê ma tehdît kenê û vanê: 'Şima terefgîrê PKKyî yê. Şima heq nêkenê ke biciwîyê.' Tepişteyê nêweşî bi saetan korîdor de payan ser o yenê vindartene. Pêro aktîvîteyî qedexe yê. Hacetê ke pê kargo yenê ma rê nênê teslîmkerdene. Kantîn de zî her çi zaf vay o, naye ra ma nêeşkenê hewcedarîyê xo peyda bikê. Zîndan de îşkenceyêko sîstematîk esto. Hetê psîkolojîkî ra ma teda vînenê. Korîdoran de û hûmaritişan de wezîfedarê zîndanê ma rê heqaret kenê."

Dadîye Hanim Muratoglu ya ke di lajê aye zîndan de yê, derheqê binpaykerdişê heqan ê Zîndanê Tarsûsî de bi waştişê paştdayîşê huqûqîyî  muracatê Şubeyê Mersînî yê Komeleya Heqanê Merdiman (ÎHD) kerd. Dadîye Hanim Muratoglu îfade kerd ke a seba weşîya lajê xo û tepişteyan biqesawet a.