Avûkatanê Baroyê Îstanbulî ra Ahmet Ergîn û Mahmut Bîrdalî roşan de Zîndanê Marmara de wendekarê tepişteyî zîyaret kerdî. Avûkatan ANFyî rê qisey kerd.

Ergînî da zanayene ke bi nê wendekaran zîndan de bi zorî pakîye dîyena kerdene û vat: ‘’Hêverî hîrê ciwanî koxûşê edlîyî de tepişîyayêne. Tîya de gijikê înan ameyo qesnayene û bi zorî înan pakîye kerda. Dima nê wendekarî sewqê koxûşêkê bînî ameyê kerdene.

Koxûşê wendekaran sey ‘koxûşanê wendekaranê rêxistinkerdeyan û nerêxistinkerdeyan’ ameyê cîyakerdene. Wendekarê ke sereştişanê keyeyan de tepişîyayê û êyê ke protestoyanê Saraçhane de tepişîyayê koxûşanê cîyayan de cabîyî. Di wendekarê nêweşî zî hema sewqê nêweşxaneyan nêameyê kerdene ke nê hêrişê polîsan de birîndar bibî.’’

Mahmut Bîrdalî zî îfade kerd ke koxûşî zaf qerebalix ê û vat: ‘’Qerebalixî ra tayê ciwanî erdî ser a kewenê ra. Moralê ciwanan zî berz o û eqlê înan xoverdayîşê teberî de yo. Ciwanî zanenê ke oyo muhîm dewamkerdişê têkoşînî yo.’’