Kurdan û dostanê înan vera tecrîdê serê Rayberê Şarê Kurdî Abdullah Ocalanî bajarê Strasbourgî yê Fransa de , verê bînaya Parlamentoyî ya Konseya Ewropa de çalakîya hîrê rojan daye destpêkerdene.

Çalakwanê ke bi vengdayîşê KCDK-E verê bînaya parlamentoyî de ameyî têhet, pê sloganan tecrîd şermezar kerd û eşkerayîye daye.

Verî  Hemserekê KCDK-E Yuksel Koçî qisey kerd. Koçî tecrîdê serê Abdullah Ocalanî sey tecrîdê vera heme kurdan hesibna û vat ganî cadê Ocalanî reyde pêvînayîş bêro kerdene.

Avûkat Omer Guneşê ke bi nameyê Platformê Ocalanî rê Azadîye qisey kerd, vist vîrî ke 22 aşmî yo Rayberê Şarê Kurdî Abdullah Ocalanî ra xebere nîna girewtene û vat ganî CPT helêkê cuwa ver eşkerayîye bido û dezgehê eleqedarî yê Ewropa rolê xo bîyarê ca.

Aktîvîsta TJK-E Helene Dersim zî  ard ziwan ke Abdullah Ocalan mifteyê çareyî yê problemanê Rojhelatê Mîyanênî yo û waşt wa Ocalan cade bêro veradayene.

Hemserekê KNKyî Ahmed Karamusî zî veng kerd Konseya Ewropa û CPTyî ke wa şirê Tirkîya ser ke tecrîd bêro wedaritene.

HDPyî ra Nursele Aydogan zî vist vîrî ke CPT dezgehê astenkerdişê îşkenceyî yo la vera tecîrdê Îmraliyî çîyêk nêkeno û venga ci da ke wa wezîfeyê xo bîyaro ca.

Reyna qiseykerdoxanê bînan zî vera tecrîdî hêrsê xo ard ziwan û semedê pîlkerdişê têkoşînî veng da.