Semedê protestokerdişê Komployê 9ê Teşrîna Verêne û tecrîdê serê Rayberê Şarê Kurdî Abdullah Ocalanî, bajarê Strasbourgî yê Fransa de verê Konseya Ewropa de çalakîya roniştişî ya çar rojan dîyaye destpêkerdene.

Çalakîya ke hetê xeylêk dezgehan ra yena kerdene roja verêne de hetê grûba Swîsre ke tede se kesî ca genê ra ameye dewrgirewtene. Mîyanê çalakwanan de sîyasetmedar û hunermendî zî est ê. Çalakîye do çar roje dewam bikero û her grûbe derheqê waştişanê xo de dosyayêk teqdîmê Konseya Ewropa bikero. Qedîyayîşê tecrîdî, şuxulnayîşê heqê hêvî, azadayê Rayberê Şarê Kurdî, qedînayîşê zextanê zîndanan û vera HDPyî û serbestveradayîşê tepişteyanê nêweşan nê waştişan ra tay ê.Wekîlê HDPyî yê verênî Ertugrul Kurkçu, Faysal Sariyildiz, Dîleke Ocalan û Nursele Aydogan do heyetî Konseya Ewropa de tewrê kombîyayîşêkî bibê.

Çalakîya roniştişî pê eşkerayîyêke dest pêkerde. Eşkerayîye de sîyasetmedaranê kurdan û îdarekaranê dezehanê kurdan qisey kerd û bale ante hêrişê vera kuran û têkoşînê kurdan ser. Qiseykerdişan de ame vatene ke kurdî do tim wayîrê Rayberê xo vejîye û ercanê xo bipawê. Reyna veng dîya berpirsîyaranê dezgehanê Ewropa ke wa şirê Tirkîya ser ke tecrîd û zextê vera zîndanan bêro qedînayene. Sîyasetmedaran welatê Ewropa sey hemkarê sûcanê dewleta tirke hesibnayî û waşt ke wa ewro ra tepişya vera zextanê dewleta tirke bêveng memanê.

Ertugrul Kurkçu, Hatîp Dîcle, Dîleke Ocalan, Selîm Sadak, Nîhat Aydogan, Lami Ozguve, Faysal Sariyildiz, Selman Irmak zî tede heyetêk semedê pêvînayşî kewt banê Parlamentoyê Konseya Ewropa.