Paytextê Belçîka Bruksel de kurdî û dostê înan verê Partlamentoyê Ewropa de ameyî têhet û şuxulnayîşê çekanê kîmyewîyan ê dewleta tirke yê vera gerîlayan protesto kerd.

 Çalakîya ke bi vengdayîşê KCDK-E ameye kerdene Almanya û Fransa ra zî xeylêk kesî tewrê ci bîyî. Çalakîye de bi desan kesan sey sembolê çekanê kîmyewîyan  kombînê sipîyî kerdî piray. Kurdî û dostê înanê ke Meydanê Luxembourgî de ameyî têhet binê varaşîyî de bêvengîya hukmatanê Ewropa û dezgehanê mîyanneteweyîyan  protesto kerde.  Çakwanan  bi sloganan xoverdayîşê gerîlayan selam kerd û Tirkîya û NATO şermezar kerdî. Çalakîye de portreyê 17 gerîlayanê ke netîceya hêrişanê kîmyewîyan de şehîd bîyî ameyî kiriştene û ame vîrvistene ke sibata 2021î ra nata HPG dîmenanê şuxulnayîş çekanê kîmyewîyan ê artêşa tirke weşaneno.Çalakwanan veng da OPCWî ke wa hinî goş bido vengdayîşê kurdan û IPPNW û pîsporanê mîyanneteweyî û na bebete bigêro dest.

Hemserekê KCDK-E Yukselî Koçî bêvengîya mîyanneteweyî û PDKyo ke destur nêda ekîbo pîspor cigêrayîş bikero şermezar kerdî û vat: ''Wazenê ke nefesê gerîlayan bipeysnê. Gerîlayî ameyoxo azad ê şarê kurdî yê.Ganî ma pêro pîya bi ruhê seferberîye wayîrê gerîlayan bivejîyê.''

Bi nameyê PYDyî Zozane Derîk zî ard ziwan ke kurdî pê çekanê kîmyewîyan nêqedîyenê û semedê pîlkerdişê têkoşînî veng da.

Badê qiseykerdişan çalakwanî ver bi Parlamentoyê Ewropa rayra şîyî. Polîsan verê çalakwanan girewt û gazê îsotî şuxulna. Polîsêkî tirkî qiseykerdêne pêrodayîş vet. Çalakwanan pê vatişê faşîstî cewab da. Polîsan dormeyê çalakwana girewt. Dima ra hîre kesan ra heyetêk şi Parlamentoyê Ewropa û pêrodayîş vindet.

Dosya ke hetê KCDK-E ra ameye amadekerdene de yeno waştene ke sere de Konseya Ewropa û dezgehê mîyanneteweyîyî wa semedê cigêrayîşê çekanê kîmyewîyan têbigêrê. Senî ke OPCWyî semedê cigêrayîşê çekanê kîmyewîyan ê Guta û Duma heyetêk şawit Sûrîye wa heyetêk zî semedê cigêrayîşê çekanê kîmyewîyan ê dewleta tirke bişawo Başûrê Kurdîstanî.

Bado ke heyet kewt Parlamentoyê Ewropa polîsî biney peyser ancîyayî. Çalakîye pê slogananê vera dewleta tirke û deyîranê têkoşînî qedîyaye.