Zîndanê Tîpê Lyî yê Patnosî de 31ê tebaxe de vera Mizgîne Atabey, Lale Kabişen û  Nazlican Barişer îşkenceyê girêyê xozî amebi kerdene. Komeleya Paştdayîşê Keyeyanê Tepişteyan (TUHAYDER), Komeleya Paştîdayîşê Kesanê ke Merdimê Xo Vînî Kerdî, (MEBYADER), endamê TJA, îdarekarê Partîya Çep a Keske û HDPyî  yê Wan û Agirî,  endamê OHDyî verê zîndanî de eşkerayîye daye.

Wekîlê Partîya Çap a Keske Gulcane Sayyigit, Sirri Sakik, Hevale Bozdag, Gulderene Varli, Zulkug Uçar, Mahmut Dindar û Newroze Uysal Aslan û xeylê kesî tewrê eşkerayîye bîyî. Eşkerayîye de pankartê ''Ma rejîmê tecrîdî û îşkenceyê sîstematîkî yê vera cinîyan lanet'' kenê ame akerdene û sloganê sey  “Bijî berxwedana zindanan“Jin jiyan berxwedan”, “Bijî berxwedana İmralı”,  “Jin jiyan azadî” ameyî vatene.

Newroze Uysala ke eşkerayîye de qisey kerd, nê vatî: ''Ewro  heme zîndananê Kurdîstan û Tirkîya de îşkence û zext est o.  Her roje zîndanan ra xeberê îşkence û binpaykerdişê heqan yenê. Heqê tedawî yê tepişteyanê nêweşan yeno astengkerdene. Senî ke şima zî zanê tewr peynî de Şakîr Turanî dinyaya xo bedilnaye. Zîndano ke ma nika verê ci de yê, tîya 31ê tebaxe de hîrê cinîyan îşkence dî. Cinîyê tepişteyî 4 saete bi girêyê xozî ameyî pawitene. Dima ra cinîyî bi îşkenceyî ameyî berdene nêweşxane. Nê îşkenceyî serranê 90yan anê vîrî. Ma do nê prosesê huqûqî teqîp bikerê. Caardişê 12ê Êlule ewro Îmrali, Patnos û Sîncan de xo mojnenê. Heta ke na herra de tecrîd û îşkence dewam bikerê, do haştîye, azadîye û hêvî mêro na herre.''

Dima ra merdimanê tepişteyan ê ke raştê îşkenceyî ameyî qisey kerd û ar ziwan ke Zîndanê Patnosî de mîrasê Esat Oktayî yeno caardene û waşt ke wa îdarekar û gardîyanê zîndanî gure ra bêrê girewtene.

Badê qiseykerdişan bi slogananê “Bijî berxwedana zindana”, “Jin jiyan azadî”, “Bijî berxwedana İmraliyê” rayraşîyayîş ame kerdene.