Par netîceya grevê vêşanîye de ke rayberîya Leyla Guven de amebi kerdene, Rayberê Şarê Kurdî Abdullah Ocalanî reyde pêvînayîş amebi kerdene. La 2019î ra nata pêvînayîşî reyna yenê astengkerdene. Nê astengîyî pê cezayanê kefîyan dewam kenê.

Avûkatanê Rayberê Şarê Kurdî Abdullah Ocalanî ra Serbay Kokluyî tecrîdê Îmraliyî û grevê vêşanîye ANFyî rê ercnayî.

Kokluyî bale ante astengkerdişê pêvînayîşê keye û avûkatan ser û vat: ''Grevê vêşanîye yê 2019î ra dima dewlete seba pêvînayîşan soz dabi la 7ê tebaxa 2019î ra naya avûkatî nêeşkenê şorê Îmrali. Nika zî bi bahaneya 'Xerîtaya  Rayîrî' ya Ocalanî ya ke 2009 de erşawitbi Mehkemeya Heqanê Merdiman a Ewropa (MHME) pêvînayîşî ameyî astengkerdene. Birêz Ocalanî reya verêne û peyêne 27ê nîsana 2020î de heqê xo yê telefonî xebitna.''

Kutluyî derheqê sîstemê Îmraliyî de wina qisey kerd: ''Sîstemê tecrîdî yê Îmraliyî yo ke şexsê Birêz Ocalanî de yeno kerdene pêro kurdî bênefes verdeno. Dima ke Birêz Ocalanî 'Xerîteya Rayîrî' pêşkêşê MHME kerde û pawitişê ci yê bi nameyê 'Meseleya Kurdan û Çareserîya Neteweya Demokratîke' tecrîd ame xorînkerdene. 5ê nîsana 2015î 'Mutabaqatê Dolmabahçe' ra nata vera ci tecrîdo mutlaq yeno caardene.''

Kokluyî ard ziwan ke dewleta ke dî Ocalan tek rayîrê çareserîya meseleyan o 7ê tebaxe ra dima verê pêro hêvîyan girewte. Kokluyî vat: ''7ê tebaxe ra dima verî de îşxalê Rojawanî welat agêra serranê 90an. Krîzê ekonomîk û sîyasîyî mojna ke bingeyê pêro meseleyan de meseleya kurdan esta. Seba ke îradeyê Birêz Ocalanî nêame şiknayene tecrîd zêdêr ame xorinkerdene.''

Kokluyî vist vîrî ke tepişteyan dest pê grevê vêşanîye kerd û vat: ''2015,2016 û 2019 de grevê vêşanîye ra dima ma eşkabî Birêz Ocalan bivînê. Waştişê tepişteyan meşrû û qanûnî yê. Ma sey avûkatanê Birêz Ocalanî venga rayaumûmîye û selahîyetdaranê dewlete danê ke verî ke zerarêko pîl nêreso tepişteyan ser ganî rayaumûmîye hîsger biba û selahîyetdarî zî tecrîd biqedînê.''