Wekîlê HDPyî yê Îstanbulî Zeynel Ozenî serrgêra dardekerdişê Seyîd Riza û embazanê ci de Meclîs de kombîyayîşê çapemenîye kerd. 

Ozenî Qirkerdişê Koçgirî û Terteleê Dêrsimî vistî vîrî û da zanayene ke Qirkerdişê Koçgirî ra dima Terteleyê Dêrsimî ame kerdene û heta ke merdimî înan reyde nêrê têrî nêeşkenê faşîzmî ra hesab bipersê. Ozenî eşkera kerd ke hema zî vera Dêrsimî polîtîkayê çinkerdiş, qirkerdiş û asîmîlasyonî dewam kenê.

Ozenî vat: ''Dewlete o çax seba ke Seyîd Riza bitepişa pêro rayîrî ceribnayî û wexto ke tepişt bi mehkemeya sexteyêne Seyîd Riza, Seyîd Uşênê Seyîd, Cebraîl, Elîyê Mirza Sîlî, Hesen Aga, Resik Huseyn, Hesenê Îvraîmê Qijî û Findiq Aga darde kerdî. Ma dej û vîrameyîşanê nê kesan û bi hezaran qurbananê Terteleyê Dêrsimî zerrîya xo ra hîs kenê. Hema zî gorê rayberanê Dêrsimî eşkera nîyê. Dewlete mesuldaranê nê qirkerdişî rê vana 'meçhûl.' Ma ma êkiştoxan şinasnenê. Ganî dewlete Terteleyê Dêrsimî de bêra têrî û seba cigêrayîşê arşîvan komîsyonêke rona. Ganî bêro eşkerakerdene ke domanê ke Terteleyê Dêrsimî ra mendî dîyayî kamyew merdiman. Ganî gorê rayberan û şarî bêrê dîyene û nameyê Dêrsimî apey bêro dayene ci.''

Wekîlê HDPyî yê Antalya Kemal Bulbulî zî Meclîs de qisey kerd û vist vîrî ke 15ê teşrîna peyêne ya 1937î de Seyîd Riza û embazê ey bi hawayêkê îlegalî ameyî dardekerdene.  Bulbulî zî waşt ke wa nameyê Dêrsimî apey bêro dayene û gorê Seyîd Riza û embazanê ey bêrê eşkerakerdene.