Sîyasetmedara kurde Aysele Tugluka ke Zîndanê Kandira de tepişîyena rixmê nêweşîyanê xo yê giranan û raporê Fakulteyê Tibî yê Zanîngehê Kocaelî zî pê raporê 'eşkena zîndan de bimana' yê Dezgehê Tipê Edlî vera nêdîyena.Seba Aysele Tugluk kampanyaya ''Seba Aysele Tugluk 1000 Cinîyî'' dîyabî destpêkerdene. Heta nika her cayê dinya de bi hezaran cinîyan îmza daye kampanya.

Çarçewa kampanya de qezaya Kadikoyî ya Îstanbulî de verê merkezê PTTyî de ameyî têhet. Cinîyan pankarta girda ke serê ci de îmzayê ke ameyî eştene estê akerde û bale ante kampanyaya îmzayan a ke semedê Tugluke ameye destpêkerdene ser.  Cinîyan Wezîrîya Edaletî, Wezîrîya Weşîye, Dezgehê Tibê Edlîyî, Serekîya Meclîsî, Yewîya Tabîban ê Tirkan (TTB) rê waştişname şewit. Cinîyan tîya binê ablûqaya polîsan de eşkerayîye daye. Cinîyan bale ante rewşa Tugluke û tepişteyanê nêweşan ê bînan ser û waşt ê cade bêrê veradayene. Cinîyî yew fekî ra qîrayî û sloganê sey Aysele Tugluk têna nîya, semedê tepişteyanê nêweşan azadîye û cinî, cuye azadîye eştê. Polîsan bi bahaneyê sloganan waşt eşkerayîya cinîyan vindarno la cinîyan estengkerdişê polîsan nas nêkerd. Cinîyan metnê eşkerayîye wend û vat heta veradayîşê Tugluke û tepişteyanê nêweşan ê bînan çalakîyê înan do dewam bikerê.