Hetkarê Serekê Pêroyî yê Partîya Keskan a Swîsre, Wekîlê Parlamentoyê Federalî û Endamê Komîsyonê Teberî yê Parlamentoyê Swîsre Nicolas Walderî derheqê vengdayîşê ‘Haştîye û Komelê Demokratîkî’ yê Rayber Apoyî de ANFyî rê qisey kerd.

Nicolas Walderî îfade kerd ke vengdayîşê Rayber Apoyî zaf girîng o û vat: ‘’Hinî wextê ci ameyo ke dewleta tirke gamêka zelale bierza, heqanê kurdan bida. Wextê şuxilnayîşê çekan hinî qedîyayo. No vengdayîş heman wextî de rayîrê pawitişê şarê kurdî yo. Bedelê çekverdayîşî de ganî Tirkîya zî gamanê zelalan bierza. Ganî operasyonê vera kurdan vinderê, kurdî bi hawayêkê fermîyî bêrê temsîlkerdene û sozê Qanûnê Bingeyîy bêro dayene.

Ocalanî bi zelalî no mesaj da ke kurdî amade yê ke çekan war verdê. Ganî Tirkîya zî rayîrê sîyasetê demokratîkî seba kurdan abikera. Erdogan ganî cade rayîrê muzakere û dîyalogan abikero. Seba çareserîye ganî temsîlkaranê PKKyî de dîyalogî bêrê kerdene. Seba serkewtişê nê prossî Swîsre mabênê Tirkîya û PKKyî de eşkena mabênçî biba’’

Walderî da zanayene ke babetêka bîne ya girînge azadîya Rayber Apoyî ya. Walderî vat: ‘’Seba serkewtişê prosesî azadîya Abdullah Ocalanî girîng a. Ganî na babete de dewleta tirke nîyetê xo yê rindî eşkera bikera. Ganî dewleta tirke zerrî ra nêzdîyê prosesî biba û gama zelale bierza. Gama destpêke ganî azadîya Ocalanî biba.’’

Walderî bale ante ser ke ganî Ewropa beşdara nê prosesî biba, PKKyî lîsteya terorî ra veja û vat: ‘’Na bira Ewropa birêka sîyasî ya. Ma nêeşkenê qalê terorê bikerê. Ganî merdim seba çalakîyanê PKKyî vajê ‘terorîzm.’ Ewropa nê prosesî de eşkera bi rolê girîngî têbigêra û verê wird terefan bida haştîye.’’