Nobeta Edaletî ya Keyeyê Şenyaşarî roja 518. de ya. Keyeyê Şenyaşarî hewayê germî ra wextêkî ra nata baxçeyê Edlîyeya Riha de nobete kerdêne.

La ewro polîsanê tirkan Emîne û Ferît Şenyaşar asteng kerdî û nêverda ke ê baxçe de çalakîya xo bikerê. Polîsan vat ke baxçe bi fermanê  Walîyê Riha Salîh Ayhanî ame qedexekerdene. Dayîke Emîne Şenyaşar vera polîsan nêrazîbîyayîşê xo mojna û vat: ''Ma asteng mekerê, şorê kiştoxan bivînê.''

Keyeyê Şenyaşarî reyna 'goşeyê edaletî yê Şenyaşaran' de dest pê nobete kerd û vat: ''Ma edaletî wazenê. Ma binê tîje de zî bimanê waştişê edaletî rê do dewam bikerê.'' 

Ferît Şenyaşarî pare kerd ke germî ra înan baxçeyê edlîye de nobeta xo kerdêne û vat: ''Walîyê Riha her roje fotografan vila keno û vano 'ez goş nana meseleyanê şarî ser.' La ferman dayo ke ma nêkewê zereyê baxçeyî. Her roje walî şiwaranê na dadîye eşnaweno. Eke o samîmî yo wa bêro tîya, goş bido ma ser. Ma çend reyî waşt walîyî reyde qisey bikerê la ey qebul nêkerd. Eke ma bendan derbaz bikerê, 100 polîsî uca de amade yê ka ma tepişê. Dewlete rojêke do dadîya mi ra uzrê xo biwaza.''

Keyeyî hesabê xo yê medyaya dîjîtale ra zî no mesaj vila kerd: ''Walîyê Riha Salîh Ayhanî Riha de cayêk nêverda ke tede bigêro. Qaşo o goş nano meseleyanê şarî ser. Walîyo ke lorîkanê dadîya kişta ci her roje eşnaweno, barîyerî nayê ro û fermanê 'mekewê edlîye' dayo.''