Tepişteyanê PKK û PAJKî 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan grevê vêşanîye dabi destpêkerdene. Grev roja 52. de bi koma 11. dewam keno.

Tepişteyê Zîndanê Kandira Nuştox Muhammed Înalî bi rayîrê telefonî waya xo Suheyla Înal reyde qisey kerd û qala teda û meseleyan kerde.

Muhammed Înalî vat: ''Zindanî xo ver danê, şarê ma yê Ewropa û merdimê Afrîkaya Başûre zî xo ver danê. La ganî zêdê şarê Vakurê Kurdîstanî payan ser o bibo. Ganî ciwanê ma wayîrê na hemle û xoverdayîşî vejîyê. Eke şar wayîrê azadîya xo nêvejîyo kampanyayê teberê welatî do netîceyêke nêdê. Ganî ma xoverdayîşê xo welatê xo, erdê xo de pîl bikerê. Ganî ciwan û şarê ma xoverdayîş biresnê astêka berzêre. Eke ma pê qerardarî têkoşînê xo bikerê serkewtiş ê ma yo.''

Muhammed Înal kam o?

Muhammed Înal wexto ke Têgêrayîşê Îslamî yê Kurdîstanî de ca girewtêne wextê Komploya Mîyanneteweyî de ame tepiştene û erzîya zîndan. Cezaya ci ya îdamî dima vurîyaye cezaya muebede. Înal 1ê adara 2019î de vera tecrîdê Îmraliyî dest pê grevê vêşanîye kerdbi û dima zî grevê xo vurna rojeyê mergî.

Eserê Înalî wina yê:

-Kitabê 'Zerduşt Wina Ferman Da', Kitabê 'Pîvanên Taoîzmê yê Sûn Tzû û Fî ma Fîh a Mewlana' û kitabê Şêx Seîdî açarnayî kurmanckî. Reyna ey kitabê bi nameyê 'Dîroka Îslama Şoreşgerî û Avakirina Îslamî' nuşt. Înalî kovaranê Modernîteya Demokratîk, Nêrîna Îslamî, Bawerî, Ronahî, Haksoz ûsn. xeylêk meqaleyî nuştî.