Hemserekê Komeleya Huqûqnasan ê Seba Azadîye (OHD) avûkat Bunyamîn Şekerî dergeqê tesîrê tecrîdî û rayîr û metodanê wedaritişê tecrîdî de ANF reyde qisey kerd. Şekerî ard ziwan ke hem Tirkîya de hem zî Kurdîstan de hêzê muxalîfî pêro ameyî tecrîdkerdene.

Avûkat Şekerî vat tecrîdê Îmraliyî ra yeno famkerdene ke welatêkê huqûqî senî bi hawayêkê keyfî eşkeno bêro batalkerdene û vist vîrî ke polîtîkaya tecrîdî newe nîya, 21 serr ê dewam kena.

Avûkat Şekerî bale ante serê  girîngîya rol û mîsyonê Ocalanî ser ke  dewlete zî naye qebul kena û vat: ''40 serran ra nata şarê kurdî têkoşîn keno. Birêz Ocalanî muxatabo verên ê na mesele yo. Dewlete seba ke nêwazena na mesele de game bierza polîtîkaya tecrîdî vera Ocalanî giran kena. Tecrîdê Îmraliyî pêro komel de ame vilakerdene, hînî wina bîyo ke hêzê muxalîfî nêeşkenê bi hawayêkê azadî vînayîşê xo vajê. Vera her kesî her şarê Tirkîya, her komelî no tecrîd yeno kerdene. Kesêk nêeşkeno fikrê xo bi azadî vajo. Xora tecrîd zî bi xo no yo. Seba ke tecrîd bêro wedaritene ganî têkoşînê azadkerdişê komelî bêro kerdene. ''

Şekerî da zanayene ke seba na babete merdimî biqesawet ê, partîyê sîyasîyî û dezgehê komelkî çarçewa demokrasîyî de ganî kom bibê û bi hawayêkê hemparî têkoşîn bikerê.