Wekîla Partîya Keske ya Fransa Marie Pochon twitter de eşkerayîyêke daye û bale ante hêrişanê kîmyewîyan ê dewleta tirke ser.

Marie Pochon vat: ''13ê çeleyê 1993yî de Paris de Peymana Qedexekerdişê Çekanê Kîmyewîyan ameye îmzakerdene. Tirkîya zî tede 165 welatan morê xo da binê na peymane. OPCW zî caardişê na peymane ra mesuldar o.

Destpêkê şerê Sûrîye ra nata şuxilîyayîşê çekanê kîmyewîyan benê sebebê nêrazîbîyayîşî. Dinya verê rejîmê Esadî de ke çekê kîmyewîyî şuxilnayêne mat mende. Aye ra dima şer resa asta herêmîye. Tîya de bi taybetî di aktorî ma eleqedar kenê: HPG û Tirkîya.

HPGyî vizêr pare kerd ke hêrişanê kîmyewîyan ê Tirkîya de 17 gerîlayan dinyaya xo bedilnaye. HPG Tirkîya sûcdar kena ke mesuldarîyanê xo yê mîyanneteweyîyan binpay kena û sûcê şerî kena. OPCW mesuldar o ke seba eşkerakerdişê raştîye û caardişê edaletî cade cigêrayîşan bikero. Na sûcdarîyêka cidî ya.

22ê teşrîna verêne de saete 14.00 de Meydanê Republique yê Parisî de sempatîzanê kurdî û muxalîfê rejîmê Erdoganî do mîtîngêkî bikerê.''