Wekîla Verêne ya HDPyî Bîrtane ameye veradayene

Endama KCDyî û Wekîla Verêne ya HDPyî ya Qersî Mulkîye Bîrtane dewaya ke bi îdîaya ''endamîya rêxistine'' ameyêne hukmkerdene ra bi cezaya 6 serr û 3 menge ameye veradayene.

Endama KCDyî û Wekîla Verêne ya HDPyî ya Qersî Mulkîye Bîrtane dewaya bi îdîaya ''faalîyetanê KCDyî'' ameyêne hukmkerdene. Roniştişê 3. dawa Mehkemeya Cezaya Girane ya 4. a Amedî de ame dîyene. Bîrtane bi rayîrê SEGBÎSî tewrê mehkeme bîye. Mehkeme de Wekîla HDPyî Leyla Guven, Hemserekê DBPyî Keskîn Bayindir, endamê KCDyî û avûkatî amade bîyî.

Bîrtane mehkeme de îfade kerd ke seba nêweşîya xo nêeşkîya beşdara mehkeme biba û dermanan ra sebeb nêeşkena qisey bika. Bîrtane vat: "KCD yew platform o ke tede wendekarî, mamostayî, nuştoxî, ronvîrî û wekîlî estê. Pêro xebatê ci seba rayaumûmîye akerde yê. Ez seba xebatanê xo yena hukmkerdene. No welatêkê demokratîkî de nêno qebulkerdene. Rewşa weşîya mi her roje bena giranêr. Seba weşkerdişî ez wazena ke bêra veradayene. 

Meqama îdîa bi îdîaya ''awankerdiş û îdarekerdişê rêxistine'' waşt ke Bîrtane 10 serre ra heta 15 serre ceza bigêra û rewşa ci ya tepişte dewam bika.  Avûkatanê Bîrtane bale ante ser ke delîlê derheqê suckerdişê Bîrtane de bi hawayêkê bêhuqûqî ameyî arêdayene û seba nêweşîya ci ra Bîrtane ganî bêra veradayene.   Heyetê mehkeme ''endamîya rêxistine'' ra cezaya 6 serr û 3 mengan daye ci bira verdayîşî girewte.