Wekîl û serekwekîlanê DEM Partî verê Wezîrîya Karanê Zereyî de hêrişê îşxalî û darbeya qeyûman bi eşkerayîyêke protesto kerdî.

Serekwekîlan ra Gulîstane Kiliç Koçyîgît ard ziwan ke îqtîdar heta ke nê sîyasetê qeyûman bîyaro ca ê zî do têkoşînê xo de israr bikerê û vat: ''Îqtîdar bi eşkera vano ke seba ke 2028 de zî îqtîdar de bimano do kurdan terbîye bikero. AKP-MHP dişmenê îradeyê şaran û kurdan o. Îqtîdar keno ke bi qeyûman ma bêtesîr bikero û xoverdayîşê şarê ma çin bikero. 

Îstanbul de 7 kesî û hetkara Hemserekanê ma Sevtape Akdag û Şaredarê Kayapinarî zî ameyî tepiştene. Dewlete hetêkî ra kena ke ma pasîfîze bikera hetê bînî ra zî kena ke muxalefetî parçe bikera. Îqtîdar hem qalê haştîye keno hem zî Rojawan û Sûrîye de îşxal û qirkerdişî keno. 

Efrînî ra 300 hezar merdiman ancî koç kerd. Haştîye bi nê hawayî nêbena. Şima bi qiseyê haştîye şerî har kenê, alozîye zêdînenê, bi qeyûman îradeyê şarî çin kenê, tecrîdî xorin kenê. Cergê ke şima perwerde kerdê hê qirkerdişan kenê. Pirsûs û Kobanê, Qamişlo û Nisêbîn heman ê.

Ma polîtîkaya qeyûman şermezar kenê, ma bi hêzanê demokrasîyî vera qeyûman vengê xo vejê. Ewro hemserekê ma Pirsûsî ra ver bi sînorî şorê. Sûrîye xeta ma ya sûr a. Ma meverdê ke şarê ma bêro qetilkerdene. Ma do têkoşîn bikerê, demokrasîyî reyde vinderê.''