Hemserekanê Partîya Demokatîke ya Şaran (HDP) Pervîne Buldan û Mîthat  Sancarî vera operasyonê qirkerdişê sîyasîyî yê vera HDPyî Meclîs de kombîyayîşê çapemenî kerd.

Buldane verî  ard ziwan ke ê do sey HDPyî seba ke qetilkarê Servet Turgutî yo hetê leşkeranê tirkî ra pê îşkenceyî helîkopterî ra ame wareştene û qetilkerdene, bêrê cezakerdene do çîyo ke destî ra bêro bikerê.

Buldane operasyonê qirkerdişê yê vera partîya ci sey ''qesasê sîyasîyî'' name kerd û vat: ''Nê operasyonî huqûqî nîyê, darbeya sîyasîye ya îqtîdarê AKP-MHPyî ya. Îqtîdar çend vînî keno zafêr hêriş keno. La şima se kenê bikerê nê nêeşkenê verê HDPyî bigerê. HDP qelaya demokrasyî ya. Na qela nêkewt û do nêkewo. Ganî herinda HDPyîjan de berpirsîyar û qetilkarê sûcanê Roboskî, 5ê Hezîrane, Pîrsus, Anqara, Soma, Çorlu, Sakarya, Afyon û îşkenceyê helîkopterî, diznayîşî bêrê destbenkerdene. Embazê ma yê ke nezaret de yê wa cade bêrê veradayene. Eke cesaretê şima esto bêrê ma cade Meclîs de semedê 6-8ê teşrîna verêne komîsyonêk ronê û raştîyan vejê werte.''

Sancarî zî nê vat: ''Ma partîya pîle ya hîrêne ya Meclîsî yê. Ma do heqê xo yê muxalefetî bişuxulnê. Ma qerar girewt ke ewro tewrê merasîmê akerdişî yê Meclîsî nêbenê. No vera Meclîsî tewirêk nîyo. Sîyaseto demokratîk yê Meclîsî muhîm o. Ma na neheqîye, bêhuqûqîye û zulmê pîlî bexçeyê Meclîsî ra danê eşnawitene. Ma do tîya çalakîya roniştişî bikerê. Heta ke Heyetê Pêroyî dewam bikero ma do çalakî de bê.''