Hemserekê Kongreya Komelê Demokratîkî (KCD) Berdan Ozturk û Wekîlê HDPyî Omer Ocalan, Feleknase Ûca, Dîlane Dîrayet Taşdemîr, Şevîne Coşkûn, Gulistane Kiliç Koçyîgît, Sezaî Temellî, Abdûllah Koç, Nûrane Îmîr, Huseyîn Kaçmaz û Erdal Aydemîr ver bi Wezîrîya Edaletî rayîr a şîyî.

Heyet nêzdîyê Wezîrîya Edaletî de hetê polîsan ra ame astengkerdene. Wextê rayraşîyayîşî de dowîzê ni nuşteyê 'Tecrîd sûcê vera merdimatîye yo', 'Wa Îmrali de huqûq bêro caardene' û 'Avûkatî wa şorê Îmraliyî' akerdî.

Heyetî dima eşkerayîyêke daye. Hemserekê KCDyî Berdan Ozturkî eşkerayîye de vist vîrî ke tecrîdê vera Abdullah Ocalanî tim beno giranêr û vat: ''Nêzdîyê di serrî yo ey ra xebere nêna girewtene. Wextêk verî heyetê CPTyî zîyaretê girawe kerd la eşkerayîyêke nêdaye. Avûkatanê Buroyê Huqûqî yê Asrinî eşkera kerd ke Birêz Ocalan heyetê CPTyî reyde pêvînayîş nêkerdo. Coka qesawetî zêdîyayî. No nêzdbîyayîş binpaykerdişê heqanê merdiman o.

Key vengê Birêz Ocalanî bêro eşnawitene komel beno aram û haştîye zêdîyena. Ganî îqtîdar bikero ke cade Birêz Ocalan avûkatanê xo bivîno. Ma nê tecrîdî qebul nêkenê. Ma do nika ra pey goş nêdê eşkerayîyanê zûran û manîpulasyonan. Heta ke tecrîd bêro wedaritene ma do çalakîyanê xo rê dewam bikerê. Tecrîd merg o, çinkerdiş o. Ya ma do pîya rayîrêkî akenê yan zî ma do pîya rayîrêkî peyda bikerê.''

Eşkerayîye ra dima wekîlan dest pê çalakîya roniştişî kerde.